Fermingar­myndin ekki til út­flutnings

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Útvarpsvekjaraklukkan fer af stað klukkan sjö og ég hlusta á fréttirnar en oft er ég þó vöknuð einhverjum mínútum fyrr en bíð alltaf eftir fréttum. Mér finnst gott að hlusta á talað mál á morgnana og þá sérstaklega eitthvað fréttatengt svo ég hlusta áfram á morgunútvarpið og fræðist oft um ótrúlegustu hluti.“

Hvað er það fyrsta sem þú gerir á morgnana

Ég elska rólega morgna og þarf minn tíma og þar sem við erum bara tvö heima með latan hund þá er lítill æsingur á heimiliinu. 

En fyrst af öllu þarf ég þó kaffi og er svo heppin að eiginmaðurinn er skilningsríkur á það og færir mér gjarnan bolla um það leyti sem ég fer framúr. 

Fyrsti kaffibolli dagsins er sá besti enda með flóaðri haframjólk. 

Svo lærði ég það af kettinum sem við áttum í rúm 16 ár að teygja alla skanka áður en ég smelli mér í dásamlegu sturtuna.“

Hvernig myndir þú lýsa fermingamyndinni þinni?

„Hún hangir hvergi uppi eða er í albúmi er það ekki nægjanlegt svar ? Ég er fermingabarn á níunda áratugnum og það eru ekki beint bestu tískuárin en þetta var samt allt innan þolanlegra marka. 

Fékk að vísu fermingarkápu sem ég fór aldrei í ekki einu sinni á fermingardaginn en var silkistrigaskóm sem notaði lengi og mikið.“

Í hvaða verkefni ertu að vinna helst í þessa dagana?

„Ég er í mjög spennandi verkefni sem er að móta stefnu og starfsemi Nýsköpunarsjóðsins Kríu en um áramótin síðustu var starfsemi Nýsköpunarsjóðs atvinnulífsins og Kríu sameinuð í einn sjóð með nýjum lögum. Framundan er stefnumótunarvinna þar sem fjárfestingaáætlun sjóðsins og starfsemi verður í forgrunni. Mér finnst fátt skemmtilegra en að byggja upp eitthvað nýtt, vinna framtíðarplön og byggja upp gott teymi. Hlakka því mikið til komandi vikna.“

Hvernig skipuleggur þú þig í vinnu?

„Ég er frekar skipulögð en algjörlega háð dagatalinu mínu og verkefnalistum. Í mínu starfi er mikið um fundi og viðburði og ég þarf því helst að taka frá tíma fyrir verkefnin og ef það gleymist geta dagarnir orðið langir. 

Yfirmenn mínir hjá Radisson SAS voru svissneskir og þar lærði ég að virða skilafresti (e. deadlines) og ekki láta verkefnin hlaðast upp. 

Ég tek reglulega „húkk“ og hreinsa upp frekar en að láta halann þvælast fyrir mér. 

Ég hef sjálf litla þolinmæði fyrir því að þurfa að ýta á eftir hlutunum.“

Hvenær ferðu að sofa á kvöldin?

„Mér finnst gott að vera komin í rúmið um hálf ellefu og þá gjarnan lesa pínu áður en ég leggst til svefns. Ég er með nokkrar úrvals bækur á náttborðinu svo það er úr nægu að velja. 

Ég trúi því að góður svefn sé einn mikilvægasti þátturinn í því halda góðri heilsu svo ég legg mikið upp úr því að fá sjö til átta tíma svefn. 

Ég fylgist með svefninum í Garmin úrinu og finnst það alveg frábært aðhald.“