„Þetta fé­lag mun aldrei deyja“

Eftir dapran fyrri hálfleik komust Rauðu djöflarnir yfir gegn gangi leiksins þegar Bruno Fernandes skoraði með góðu skoti úr aukaspyrnu. Markið kom í blálok fyrri hálfleiks og virtist gefa lærisveinum Amorim trú, nokkuð sem hefur skort undanfarið. Þó leikurinn hafi endað 1-1 þá fengu heimamenn betri færi en oft áður og gátu verið svekktir með aðeins eitt stig.

„Mér fannst við spila vel. Auðvitað viljum við ekki þurfa að verjast svona mikið og láta andstæðinga okkar hafa boltann,“ sagði Amorim eftir leik en sagði þó að leikskipulagið hefði litast af þeim leikmönnum sem voru leikfærir.

„Victor Lindelöf hefur til að mynda ekki spilað mikið og Casemiro líður betur í svona leikjum.“

„Þetta snýst líka um andstæðinginn. Síðast pressuðu þeir maður á mann út um allan völl geng PSV í Meistaradeild Evrópu. Það er erfitt að spila gegn því. Við eigum leikmenn sem njóta sín vel í skyndisóknum, Alejandro Garnacho átti virkilega góðan leik.“

„Þegar maður fær á sig mark þá þreytast leikmenn. Við reyndum að velja réttu augnablikin til að pressa hátt.“

„Sem þjálfari Manchester United getur maður ekki spilað of mikið á þennan hátt. Maður verður að reyna vinna leiki. Ég veit að þetta er pirrandi fyrir stuðningsfólkið og maður verður að takast á við það að taka ákvarðanir sem eru ekki alltaf vinsælar.“

Nokkur þúsund mótmæltu eignarhaldi Man United fyrir leik. Amorim var spurður út í það.

„Þetta félag mun aldrei deyja, það er nokkuð ljóst. Maður finnur það út á götu. Þetta er stórfyrirtæki og mögulega finnst öllu stuðningsfólki deildarinnar erfiðara að komast á leiki og að það sé að borga meira fyrir miða á völlinn.“

„Við viljum gefa þeim allt sem við eigum. Í framtíðinni munum við ekki spila eins og í dag. Við vorum svo nálægt því að skora annað mark í síðari hálfleik. Við sýndum mikinn baráttuanda og ég tel það mikilvægt. Við þrýstum liðinu fram á við en ekki til baka. Við komumst í aðstæður til að vinna leikinn.“

Að endingu var Amorim spurður út í 18 ára miðvörðinn Ayden Heaven sem var að spila sinn fyrsta deildarleik fyrir félagið.

„Hann spilaði virkilega vel að mínu mati. Honum líður vel á boltanum, er rólegur en samt sem áður aggressífur þegar kemur að því að vinna boltann. Ég tel okkur vera með virkilega góðan leikmann í höndunum.“