Lausn máls ÍL-sjóðs loks í sjón­máli

Frá þessu sagði í tilkynningu fjármála- og efnahagsráðuneytinu í morgun. Þar kemur fram að hljóti tillögurnar samþykki kröfuhafa og Alþingis muni ríkið gefa út ríkisskuldabréf upp á 540 milljarða króna til þess að gera upp kröfur í ÍL-sjóð. Heildarvirði HFF-bréfanna er metið á 651 milljarð króna og afgangurinn verður greiddur með afhendingu annarra verðbréfa, gjaldeyris og reiðufjár.

Davíð Rúdólfsson, framkvæmdastjóri Gildis - lífeyrissjóðs, fagnar því að tillögurnar séu komnar fram.

„Lífeyrissjóðirnir fengu kynningu á þessu núna morgun þannig núna er það komið í þeirra hluta að rýna þetta. Þetta eru flókin viðskipti, flókin tillaga. Það mun eflaust taka þá einhvern tíma að rýna og meta þetta en það er mjög jákvætt að tillagan sé komið fram og að ráðgjafarnir hafi treyst sér til að leggja hana fram.

Ekki í samræmi við upphaflegar hugmyndir Bjarna

Davíð segir niðurstöðu viðræðunefndarinnar og ráðgjafa lífeyrissjóðanna, Arctica finance og Logos, ekki hafa verið í samræmi við þá stefnu sem mörkuð var þegar málið hófst fyrir rúmum tveimur árum. Niðurstaðan sé frekar í takti við sjónarmið lífeyrissjóðanna.

Þá var Bjarni Benediktsson, þáverandi fjármálaráðherra, harðlega gagnrýndur fyrir hugmyndir hans um slit ÍL-sjóðs.

„Fyrirhuguð löggjöf fæli í sér eignarnám, væri andstæð stjórnarskrá og til þess fallin að baka íslenska ríkinu skaðabótaskyldu sem kynni að hafa í för með sér veruleg viðbótarfjárútlát af hálfu ríkissjóðs í formi dráttarvaxta og kostnaðar,“ sagði til að mynd í yfirlýsingu tuttugu lífeyrissjóða í maí árið 2023.

„Að því leytinu til þá er það mjög jákvætt. Fljótt á litið er greiðslan, sem ríkið sér fyrir sér að greiða fyrir HFF-bréfin, það eru eðlislík skuldabréf, að megninu til ríkisskuldabréf og það er mjög jákvætt. En eins og ég segi, þetta er flókin tillaga og það er erfitt að mynda sér skoðun á stuttum tíma varðandi eins stórt mál og þetta er fyrir hagsmuni sjóðanna,“ segir Davíð.

Lausn gæti legið fyrir eftir mánuð

Gangi allt eftir stendur til að halda fund skuldabréfaeigenda með ríkinu þann 10. apríl næstkomandi.

„Þannig að það er svolítið í að það komist endanleg niðurstaða í málið og hvernig lífeyrissjóðirnir og aðrir skuldabréfaeigendur meta þessa tillögu. Hún verður sem sagt borin fram á formlegum fundi skuldabréfaeigenda.“

Samkvæmt tilkynningu í morgun þurfa 75 prósent skuldabréfaeigenda að samþykkja tillöguna til þess að hún nái fram að ganga. Það er að segja 75 prósent miðað við kröfufjárhæð, ekki fjölda.

Að sögn Davíð voru það ráðgjafar átján lífeyrissjóða sem stóðu í samningaviðræðum við ríkið en tveir stórir lífeyrissjóðir hafi sagt sig frá því ferli. Það eru Lífeyrisjóður Verslunarmanna og Lífeyrissjóður starfsmanna ríkisins.