Nú er hægt að bjóða í fast­eignir með smáforriti

„Hómer gerir notendum kleift að gera kauptilboð í gegnum appið sem er nýjung á íslenskum fasteignamarkaði. Þetta sparar bæði kaupendum og fasteignasölum mikinn tíma og einfaldar allt ferlið við kaup og sölu fasteigna,“ er haft eftir Frosta Guðjónssyni, annars hugmyndasmiðs smáforritsins Hómers, í fréttatilkynningu.

Þar segir að Hómer sé nýtt fasteignasmáforrit, hið fyrsta sinnar tegundar á Íslandi. Hugmyndasmiðir forritsins, Frosti Guðjónsson og Birkir Guðmundsson, hai unnið að þróun þess í um eitt ár í samstarfi við tækniþróunarfyrirtækið Apparatus.

Á þriðja þúsund eigna á skrá

Í tilkynningu segir að smáforritið státi af af öflugri leitarvél og eignavakt sem sendi notendum tilkynningar beint í símann þegar eignir sem passa við leitarskilyrðin þeirra koma á markað. 

Birkir sé starfandi lögmaður og Frosti flugmaður og saman hafi þeir fjármagnað þróunina án utanaðkomandi fjárfesta, sem hafi gefið þeim fullt frelsi í útfærslu verkefnisins. Þeir hafi þegar hafið samstarf við nokkrar fasteignasölur en stefni á að fá fleiri til liðs við sig á næstu vikum. Í dag séu um 2600 eignir í smáforritinu.

„Við erum ekkert smá spenntir fyrir þessu. Appið sjálft hefur verið í bígerð í rúmt ár og hefur samstarfið við Apparatus gengið vonum framar. Markmiðið hefur frá upphafi verið að einfalda fasteignaleit fyrir fólk í kauphugleiðingum og um leið vinnu fasteignasala sem geta nú fengið útfyllt kauptilboð sent beint til sín,“ er haft eftir Birki.

Fasteignaviðskipti verði skilvirkari, hraðari og þægilegri

Þá segir að smáforritið sé hannað með einfalt og notendavænt viðmót í huga og bjóði upp á lausnir sem auki yfirsýn fasteignasala og auðveldi gerð kaupsamninga. Markmið forritsins sé að gera fasteignaviðskipti skilvirkari, hraðari og þægilegri fyrir alla aðila viðskiptanna.

Prófunarfasinn hafi farið betur af stað en gert var ráð fyrir í upphafi og Hómer sé komið efst á vinsældalistann í flokknum lífstíll í App Store. Nú geti einstaklingar í fasteignahugleiðingum hlaðið niður forritinu og skoðað nýjar eignir á aðgengilegan og þægilegan hátt.