Gat farið hvert sem er en valdi að vera hjá okkur

Slot benti á að Salah hefði í raun getað valið að fara til hvaða félags sem er í heiminum en ákveðið að halda kyrru fyrir hjá Liverpool.

„Ég er auðvitað mjög glaður. Hann hefur sýnt það í svo mörg ár í röð hjá þessu félagi hve mikils virði hann er fyrir liðið og félagið í heild. Við erum hæstánægðir með að hann hafi framlengt til tveggja ára og vonandi sýnir hann á sunnudaginn [gegn West Ham] hversu mikilvægur hann hefur verið allt tímabilið fyrir okkur,“ sagði Slot á blaðamannafundi.

Miðað við hve stutt er þar til að fyrri samningur Salah átti að renna út hafa eflaust margir stuðningsmenn Liverpool óttast að þessi 32 ára Egypti myndi kveðja í sumar.

„Léttir? Fyrir stuðningsmennina reikna ég með. En það kemur ykkur ekki á óvart að ég vissi aðeins betur stöðuna á samningaviðræðunum yfir leiktíðina. Kannski var þetta óvænt ánægja fyrir stuðningsmennina Ég hef vitað talsvert lengur að allt stefndi í rétta átt.

Richard Hughes [yfirmaður íþróttamála] á mikið hrós skilið því Mo Salah hefði, sem samningslaus leikmaður, getað farið til hvaða félags sem er. En hann hélt kyrru fyrir hjá okkur og fyrir það á Richard hrós skilið,“ sagði Slot sem vildi ekki meina að hann hefði sjálfur átt mikinn þátt í ákvörðun Salah.

„Ég er hluti af ferlinu en ég held að ég verðskuldi nú ekki mikið hrós. Þetta er fyrst og fremst val Mo og umboðsmanns hans. Í öðru lagi lagði félagið – FSG, Richard, Michael Edwards – mikið í sölurnar til að hann framlengdi. Það þýðir aðallega peningar,“ sagði Slot.

BBC segir ljóst að Salah lækki ekki í launum, frá því að hann samdi um 350.000 pund á viku í síðasta samningi. Hann fær því ekki minna en 8,6 milljónir króna í laun á dag.

„En þetta snerist ekki bara um peninga. Þetta sýnir líka að það er ekki bara þessi leiktíð sem er góð. Við ætlum líka að eiga mjög góða næstu leiktíð og ég held að Mo sé sannfærður um að við eigum fína möguleika á því,“ sagði Slot og benti á að það að halda Salah hlyti að hjálpa til við að fá aðra til að skrifa undir hjá félaginu.

Hollendingurinn ræddi einnig um mikilvægi þess að hafa kantmann í sínu liði sem væri í allra fremstu röð. Mikilvægi þeirra í nútímafótbolta væri enn að aukast að undanförnu.

„Ef ég skoða alla kantmennina í fótboltaheiminum þá sé ég þá ekki vera að yfirspila andstæðinga sína allan tímann, í 90 mínútur. Kantmenn þurfa að vera skapandi og það er það erfiðasta við fótbolta, sérstaklega gegn lágri blokk sem margir góðir kantmenn þurfa að eiga við þessa dagana. Það er eðlilegt að menn missi stundum boltann eða að eitthvað klikki hjá þeim.

En heilt yfir þá hefur Mo gríðarleg áhrif á okkar leik með mörkum sínum og stoðsendingum, og það er ekki það eina. Hann er mikil ógn en hann er ekki sá eini.

Kantmenn eru að verða meira og meira mikilvægir í nútímafótbolta því liðin verjast sífellt aftar. Ef maður skoðar Raphinha, Lamine Yamal, Kvicha Kvaratskhelia, Desire Doue, Bukayo Saka eða Gabriel Martinelli þá geta þeir allir opnað öftustu línu og skapað færi. Það er það sem Mo gerir fyrir okkur,“ sagði Slot.