Innlent

Halda sam­veru­stund vegna slyssins

Rafn Ágúst Ragnarsson skrifar
Þrír hinna slösuðu eru nemendur við skólann.
Þrír hinna slösuðu eru nemendur við skólann. Vísir

Fjölbrautarskóli Norðurlands vestra á Sauðárkróki býður til samverustundar í skólanum á þriðjudaginn vegna alvarlegs umferðarslyss sem átti sér stað suður af Hofsósi á föstudagskvöld.

Fjórir piltar voru um borð í bíl sem hafnaði utan vegar og slösuðust allir. Þrír voru fluttir í tveimur sjúkraflugvélum og einn með þyrlu Landhelgisgæslunnar til Reykjavíkur.

Um þrjátíu ungmenni voru á vettvangi þegar slysið varð en enn er verið að rannsaka tildrög þess. Hópur ungmenna ók í norðurátt þegar einn bíllinn kastaðist utan vegar með þeim afleiðingum að ökumaður og farþegarnir þrír slösuðust. Þrír piltanna sem slösuðust eru nemendur við Fjölbrautaskóla Norðurlands vestra.

„Við ætlum að bjóða þeim sem vilja til að koma saman og ræða málin í ljósi þessa hörmulega slyss. Hugmyndin er að lofa fólki að koma saman og blása aðeins og létta af sér,“ segir Þorkell Þorsteinsson, settur skólameistari skólans.

„Þetta snertir mjög marga, þetta er lítið samfélag. Stór hópur ungmenna kom að slysinu, einhverjir sem hafa þörf á að fá að tjá sig,“ segir hann.

Samverustundin fer fram í bóknámshúsi skólans klukkan fimm síðdegis á þriðjudaginn.

Skagafjörður

Tengdar fréttir

Fjórir drengir sem voru í bílnum slösuðust allir

Fjórir drengir voru fluttir á Landspítalann í Reykjavík eftir alvarlegt umferðarslys sem varð suður af Hofsósi í gærkvöldi. Um þrjátíu ungmenni voru á vettvangi en tilkynning um slysið barst klukkan hálf níu í gærkvöldi. Pétur Björnsson, yfirlögregluþjónn hjá lögreglunni á Norðurlandi vestra, segir tildrög slyssins ekki liggja fyrir að svo stöddu en rannsókn þess stendur yfir.

Mest lesið


Fleiri fréttir

Sjá meira


×

Mest lesið