Erlent

Fjórir létust þegar kláfferja hrapaði á Ítalíu

Sólrún Dögg Jósefsdóttir skrifar
Frá björgunaraðgerðum, sem gengu að sögn sveitarstjóra hægt. 
Frá björgunaraðgerðum, sem gengu að sögn sveitarstjóra hægt.  AP/Soccorso Alpino e Speleologico

Fjórir eru látnir og einn alvarlega slasaður eftir að kláfferja féll til jarðar nærri Napólí í suðurhluta Ítalíu í dag. 

Þetta hefur Guardian eftir slökkviliði og björgunarsveitum á svæðinu. Slysið varð við fjallið Monte Faito, um 45 kílómetrum suðaustan Napólí. 

Í umfjöllun ítalskra miðla segir að vír sem kláfurinn hékk í hafi slitnað og kláfurinn hrapað til jarðar í framhaldinu, á sérstaklega bröttu svæði. Sextán farþegum hafi verið bjargað úr hinum kláfferjunum, sem stöðvuðust þegar slysið varð. 

Þá hefur Guardian eftir Vincenzo De Luca sveitarstjóra Campania-héraðs að björgunaraðgerðir hafi gengið hægt vegna þoku og mikilla vinda. Hann segir alla hinna látnu hafa verið ferðamenn. 

Sams konar slys varð í norðurhluta Ítalíu í maí 2021. Kláfferja hrapaði til jarðar með þeim afleiðingum að fjórtán létu lífið. 

Ítalía

Tengdar fréttir

Minnst átta dánir í kláf­ferju­slysi á Ítalíu

Minnst átta eru dánir eftir að kláfferja hrapaði nærri Maggiore vatni á Norður-Ítalíu. Ítalskir miðlar segja að tvö börn hafi verið flutt á sjúkrahús af vettvangi. Ítalska fréttastofan Ansa greinir frá því að ellefu hafi verið um borð í ferjunni.

Mest lesið


Fleiri fréttir

Sjá meira


×

Mest lesið