„Létum hluti sem við stjórnum ekki fara of mikið í taugarnar á okkur“

Staðan í ein­vígi liðanna er 1-1 fyrir þriðja leik kvöldsins. Álft­nesingar komu með gott svar í leik tvö í kjölfar dræmrar frammistöðu í fyrsta leik í Síkinu. Ein­vígið heldur nú aftur í Síkið og segir Pétur Rúnar sitt lið ekki hafa hitt á sinn dag í síðustu viður­eign liðanna.

„Þeir voru bara góðir og við kannski ekki alveg á okkar degi,“ segir Pétur Rúnar. „Við létum hluti sem við stjórnum ekki fara aðeins of mikið í taugarnar á okkur.“ 

„Bara hrós á þá. Þeir settu niður stór skot í fjórða leik­hluta. Dúi, Hörður Axel og Klonaras settu allir þrist þarna í fjórða leik­hluta eftir slæmar róteringar af okkar hálfu. Svo var þetta bara 50/50 leikur undir restina. Við hefðum kannski geta út­fært þessa lokasókn eitt­hvað betur en annars voru þetta bara tvö góð lið og þeir urðu ofan á þarna.“

Var ekki að búast við neinu öðru

Það var alveg kýr­skýrt í huga Péturs að Álft­nesingar væru ekkert lamb að leika sér við.

„Við vissum að við værum ekkert að fara labba í gegnum þá. Við erum komnir í undanúr­slit. Það hefði verið óeðli­legt ef við hefðum farið 3-0 í gegnum öll ein­vígin. Og eins og ég sagði í ein­hverju viðtali eftir seríuna við Kefla­vík þá vorum við ekkert langt frá því að lenda 2-0 undir þar. Það voru líka hörku leikir sem kláruðust þarna undir restina. Auðvitað var það svekkjandi að hafa ekki unnið þennan annan leik því við gáfum okkur alveg tækifæri til þess en ég var ekki að búast við neinu öðru en að þeir væru tölu­vert betri en þeir sýndu í leik eitt. Þeir gerðu bara mjög vel og við ætlum að mæta klárir í kvöld. Setja seríuna aftur okkur í hag.“

Einbeiting á James og Okeke

Hvar hafa áherslurnar hjá ykkur Tindastólsmönnum legið á milli leikja?

„Við þurfum að ein­beita okkur betur að því að stöðva Justin James. Sóknar­leikur þeirra fer svolítið mikið í gegnum hann. Við höfum verið að skoða nokkrar út­færslur á því hvernig við getum stöðvað hann.“ segir Pétur Rúnar en téður James setti niður heil 29 stig í síðasta leik liðanna og gaf sex stoðsendingar í þokkabót.“ 

„Svo þarf að stíga David Okeke út þegar að hann er inn í teignum. Hann gerði okkur ansi erfitt fyrir á köflum í síðasta leik þar sem að hann var að hirða alla lausa bolta. Við þurfum að vera varir um okkur, ekki sofna á verðinum,“ bætir Pétur við en óhætt er að segja að Okeke hafi komið inn af fídómskrafti í lið Álftnesinga í síðasta leik eftir að hafa verið að glíma við meiðsli. Hann setti niður átján stig, tók 10 fráköst. 

Þriðji leikur fram­undan, þið á heima­velli í Síkinu, staðan 1-1 í ein­víginu, er ekki pressan á ykkur?

„Nei ekki þannig. Við gerðum bara mjög vel í vetur í því að tryggja okkur þetta fyrsta sæti og fá þennan heima­vallarrétt. Við förum í alla leiki til þess að vinna og það er ekkert ein­hver auka pressa þótt að við séum á heima­velli. Það þarf að vinna þrjá leiki og auðvitað ætlum við að vinna hér í kvöld en heimurinn ferst ekkert þó þetta fari eitt­hvað öðru­vísi. En við viljum auðvitað og ætlum okkur að vinna í kvöld. Gerum allt til þess.“

Leikur þrjú í undanúrslitaeinvígi Tindastóls og Álftaness í Bónus deildinni hefst klukkan korter yfir sjö í kvöld. Leikurinn verður sýndur í beinni útsendingu á Stöð 2 Sport, upphitun frá Síkinu hefst hálftíma fyrir leik.