Awoniyi vaknaður eftir lífs­hættu­legar en vel heppnaðar að­gerðir

Awoniyi varð fyrir alvarlegum meiðslum í leik gegn Leicester síðasta sunnudag, breska ríkisútvarpið greinir frá því að þarmar hans hafi rifnað, eftir harðan árekstur við markstöngina.

Awoniyi var strax fluttur á sjúkrahús og gekkst undir neyðaraðgerð á mánudag, honum var síðan haldið sofandi fram yfir seinni aðgerðina í gær, miðvikudag. Aðgerðirnar eru sagðar hafa gengið vel, Awoniyi var vakinn og fékk að hitta fjölskyldu en eyddi nóttinni undir eftirliti á sjúkrahúsi.

Lífshættuleg meiðsli

Awoniyi er ekki í lífshættu en meiðslin sem hann varð fyrir og aðgerðin sem hann gekkst undir, þegar þarmarnir rifnuðu, eru sögð lífshættuleg.

„Þetta eru mjög alvarleg meiðsli og geta verið lífshættuleg“ sagði ristil- og þarmaskurðlæknirinn Gillian Tierney í samtali við breska ríkisútvarpið.

Hann sagði um 9 prósent líkur á andláti þegar gengist er undir slíka aðgerð á þörmunum, en tók fram að Awoniyi væri íþróttamaður í toppformi, ekki maður á háum aldri með fleiri kvilla undirliggjandi, og lífslíkur hans því töluvert betri.