„Auð­veld á­kvörðun“ þegar hann heyrði af á­huga Liverpool

„Þetta var auðvelt. Liverpool sagðist hafa áhuga og eftir það var þetta auðveld ákvörðun fyrir mig,“ sagði Jeremie Frimpong í viðtali á miðlum Liverpool. Hann er talinn kosta Liverpool um þrjátíu milljónir punda.

Umboðsmaður Frimpong fékk skýr skilaboð frá leikmanninum í kjölfarið af fyrirspurn Liverpool. „Landaðu þessu bara,“ sagðist Frimpong hafa sagt við hann.

Frimpong hefur spilað með Leverkusen frá því að félagið keyptu hann frá Celtic í janúar 2021.

Hann hefur síðan orðið að lykilmanni liðsins og hjálpaði Leverkusen að vinna þýska meistaratitilinn í fyrra.

Nú fær hann það verkefni að leysa af Trent Alexander Arnold sem er farinn til Real Madrid.

Frimpong er einn af mörgum Hollendingum í liði Liverpool því auk knattspyrnustjórans Arne Slot eru þar einnig fyrirliðinn Virgil van Dijk, Cody Gakpo og Ryan Gravenberch.

Liverpool tilkynnti um komu Frimpong á sama degi og gengið var frá félagsskiptum Trents til Real Madrid. Báðir verða leikmenn sinna nýrra félaga þegar glugginn opnar 1. júní.