„Þakk­lát fyrir að vera á leið aftur inn í jafn frá­bært um­hverfi“

Hersler, sem kom til Njarðvíkur á miðju tímabili, hefur nú framlengt samning sinn við félagið. Hún hjálpaði Njarðvík að verða bikarmeistari og vera síðan aðeins einu sniðskoti frá Íslandsmeistaratitli.

Njarðvíkingar staðfesta þessar stóru fréttir á heimasíðu sinni.

Á Íslandsmótinu þá var þessi öflugi sænski miðherji með 22,3 stig, 8,2 fráköst og 3,0 stoðsendingar að meðaltali í leik. Hún hækkaði þessar tölur í úrslitakeppninni þar sem hún var með 22,7 stig, 8,9 fráköst og 3,3 stoðsendingar í leik. Hún skoraði einnig 25 stig í bikarúrslitaleiknum.

„Ég er mjög spennt fyrir því að koma aftur í Njarðvík því ég naut mín vel hjá félaginu á síðustu leiktíð, bæði innan og utan vallar. Ég er einnig spennt fyrir því að byggja ofan á það verk sem við hófum á síðustu leiktíð og berjast fyrir markmiðum okkar í liðinu,” sagði Hersler í samtali við heimasíðu Njarðvíkur, UMFN.is

„Þá var það ánægjulegt hvernig starfsfólk, liðsfélagar og stuðningsmenn voru opin og innileg svo ég er þakklát fyrir að vera á leið aftur inn í jafn frábært umhverfi. Get ekki beðið eftir að hitta alla á nýjan leik,” sagði Hersler.

Hersler er 31 árs gömul, fædd í maí 1994 og 190 sentimetrar á hæð. Áður en hún kom til Njarðvíkur þá hafði hún spilað í Egyptalandi, á Englandi, á Spáni, í Ísrael, á Ítalíu, í Slóveníu, í Svíþjoð, í Tyrklandi og í Bandaríkjunum.