Leik­menn ensku stórliðanna kvarta við leikmannasamtökin

Ástæðan fyrir þessum áhyggjum þeirra eru æfingaferðir ensku félaganna til Asíu og Ameríku.

Leikmenn eru ekki ánægðir með þróun mála en félögin eru alltaf að ganga lengra í því að troða slíkum ferðum inn á annars fullskipað keppnisdagatal. Nú eru félögin farin að taka af endunum á annars stuttum sumarfríum leikmanna. ESPN segir frá.

Manchester United liðið flaug þannig til Asíu strax eftir lokaleik sinn á tímabilinu og lék tvo æfingarleiki við úrvalslið frá Malasíu og Hong Kong.

Í maí í fyrra þá mættust Tottenham Hotspur og Newcastle United í æfingaleik í Melbourne í Ástralíu aðeins þremur dögum eftir lokaumferð ensku úrvalsdeildarinnar.

Manchester City hefur líka farið til Kanada og Bandaríkjanna strax eftir tímabil á undanförnum árum.

Félögin hagnast vel á þessum ferðum en Manchester United fékk í kringum átta milljónir punda, 1,3 milljarða króna, fyrir þessa ferð til suðaustur Asíu.

Leikmenn United voru aftur á móti pirraðir eftir slakt tímabil og spiluðu margir leikmenn liðsins tvo slaka leiki. Amad Diallo og Alejandro Garnacho fengu líka báðir á sig gagnrýni fyrir slæm samskipti sín við stuðningsmenn.

Alþjóðaleikmannasamtökin, FIFPRO, hafa látið vel í sér heyra vegna auknu álagi á leikmönnum en það snýst meira um tímabilið sjálft enda alltaf verið að bæta við leikjum og nýjum keppnum.

Þessar áhyggjur snúast aftur á móti meira um það að þarna er verið að troða leikjum og löngum æfingaferðum inn í sumarfrí leikmanna sem er stutt fyrir. Sumarfríi leikmanna styttist þarna enn frekar og þeir hafa því minni tíma til að jafna sig og hlaða batteríin fyrr annað krefjandi tímabil.