„Grínast oft með að ég gaf honum um ellefu ár til að hætta við“

Aldís Sif starfar sem lögfræðingur hjá Heimum, en Guðlaugur er fjárfestingastjóri og einn eigandi Visku Digital Assets. Hjónin hafa verið saman í rúman áratug og eiga tvo drengi, Gísla Snæ, sjö ára, og Bjarna Frey, þriggja ára. Fjölskyldan býr í Kópavogi.

Persónuleg ljóð um alla gestina

Hvenær og hvernig trúlofuðust þið?

Við trúlofuðumst 29. ágúst 2014 á Vatnshlíðarhorni í Hafnarfirði. Við höfðum því verið trúlofuð í 11 ár þegar við loksins létum verða að því að ganga í það heilaga. Ég grínast oft með að ég gaf honum um  ellefu ár til að hætta við.

Fór langur tími í að undirbúa stóra daginn?

Mig langar að segja nei, en við fengum þá hugmynd að semja persónuleg ljóð um alla gestina. Ég myndi segja að all nokkur kvöld í vetur hafi farið í að semja ljóð um hvern og einn gest.

Voruð þið sammála í skipulaginu? 

Já, við vorum það og skipulagið gekk mjög vel. Okkur langaði að gifta okkur í kirkju við hátíðlega athöfn með fólkinu okkar viðstatt. Við kolféllum bæði fyrir Sjálfstæðissalnum, og þá var uppskriftin bara komin.

Hvernig var brúðkaupsdagurinn? 

Hann var dásamlegur frá A til Ö. Við getum ekki hætt að rifja hann upp og tala um hann. Vinkonur mínar sóttu mig um morguninn, en ég heyrði tónlistina úr bílnum þegar þær keyrðu inn á bílastæðið. Við höfðum morgunverð saman með mömmu minni, tengdamömmu og systrum, og strákarnir voru saman. Við reyndum að taka nokkrar myndir áður en við fórum í kirkjuna, en strákarnir okkar höfðu meiri áhuga á moldinni á Austurvelli og spjölluðu við ömmur sínar og afa.

Athöfnin var dásamleg og strákarnir okkar tóku stóran þátt í henni. Sá eldri lék prestinn og yngri vildi ekki gefa okkur hringana en það gekk að lokum. 

Pétur Ragnhildarsson gaf okkur saman og hann var alveg æðislegur. Þegar við gengum út úr kirkjunni tók Lúðrasveit Verkalýðsins á móti okkur og marseraði með okkur yfir í salinn, þar sem gleðin hélt áfram. Eftir veisluna héldum við áfram á Uppi bar, þar sem DJ Dóra Júlía skapaði frábæra stemningu, eins og henni einum er lagið.

Veislunni lyft upp á annað plan

Hvaðan fenguði innblástur?

Ég held að við höfum fyrst og fremst fengið innblástur hvort frá öðru, auk Kollu vinkonu minnar sem spáði í hvert smáatriði með okkur. Hún benti okkur á vinkonu sína, Láru Ósk hjá Leonora, sem skreytti allt óaðfinnanlega fyrir okkur. Við gerðum allt nákvæmlega eins og okkur langaði og ákváðum að sleppa tökunum á deginum sjálfum og einfaldlega njóta hans.

Voru einhver skemmtiatriði?

Veislustjórarnir voru heldur betur með show! Svo komu vinkonur mínar mér á óvart með Hjálmari Erni en hann stýrði leik í brúðkaupinu. Okkar uppáhalds tónlistarmenn skemmtu gestum, þar á meðal Kjalar, Unnstein Manúel, Björn Jörundur, Daníel Ágúst, DJ Margeir og DJ Dóru Júlíu.

Hverjir sáu um veislustjórn? 

Systkinin Áslaug Arna Sigurbjörnsdóttir og Magnús Sigurbjörnsson voru veislustjórar hjá okkur, en þau eru systkinabörn Gulla. Þau lyftu veislunni upp á allt annað plan og við fáum enn gæsahúð þegar við hugsum til lagsins sem þau sömdu og sungu fyrir okkur! 

Orð ná ekki að lýsa því hversu frábær þau voru, en hvert smáatriði fékk 10,5.

Allar sammála um að þetta væri rétti kjóllinn

Hvað voru margir gestir?

Það voru um 140 manns.

Hvaðan eru fötin ykkar? 

Kjóllinn er úr Loforð og smókinginn er úr SuitUp Reykjavík. Slaufuhnúturinn er einnig frá SuitUp, en Gulli fór til þeirra rétt áður en hann hélt í kirkjuna til að fullkomna hnútinn.

Hvernig gekk að velja kjólinn?

Ég fór í mátun hjá Loforð með vinkonum, systrum og mömmu og mátaði nokkra kjóla. Þegar ég fór í þennan þá vorum við allar sammála um að þetta væri kjóllin. Ætlaði samt sem áður að sofa aðeins á þessu og gleymdi mér og ég viðurkenni að ég var ekki alveg nógu skipulögð þegar kom að þessu. Þær hjá Loforði reddu mér kjólnum, en hann var síðasta eintakið frá framleiðandanum.

Athöfnin stendur upp úr

Var eitthvað sem kom mest á óvart?

Hvað dagurinn þaut hjá! Við hefðum aldrei trúað hvað svona langur dagur myndi líða hratt. Það kom kannski ekki á óvart, en það var framar væntingum hvað þetta var ótrúlega gaman og hversu ástin og gleðin voru áþreifanleg.

Hvað stendur upp úr?

Athöfnin stendur klárlega uppúr. Hún var hátíðleg og dásamleg en jafnframt frjálsleg. Ég held að við höfum verið búin að vera við altarið í tvær mínútur þegar strákarnir vildu koma til okkar og voru í fanginu okkar allan tímann. Við fengum Kjalar Martinsson beint frá Berlín til þess að spila í kirkjunni en hann á mjög sérstakan stað í hjarta fjölskyldunnar. Hann var með eldri strákinn okkar í liðveislu og hjálpaði okkur mikið á erfiðum tímum. 

Mómentið þegar hann söng Skinny love með Bon Iver og Gulli spilaði á gítar er eitthvað sem ég mun aldrei gleyma.

Eruð þið með eitthvað gullið ráð fyrir komandi brúðhjón? 

Ráðið okkar er bara að njóta í botn og taka inn hvert einasta augnablik. Það er ekki oft á lífsleiðinni sem maður er með öllu fólkinu sem maður elskar á sama tíma að gleðjast með manni.

Ætlið þið í brúðkaupsferð? Búin að ákveða hvert? 

Draumurinn er að fara í nokkra daga brúðkaupsferð til suður Frakklands í haust. Ég reyndar skráði mig í hlaupaferð hjá Mari Järsk, kannski verður það bara mín brúðkaupsferð.