Enski boltinn

Írskur smáklúbbur græðir meira en hálfan milljarð þökk sé Liverpool

Óskar Ófeigur Jónsson skrifar
Caoimhin Kelleher fagnar meistaratitli Liverpool með þeim Trent Alexander-Arnold og Andy Robertson.
Caoimhin Kelleher fagnar meistaratitli Liverpool með þeim Trent Alexander-Arnold og Andy Robertson. Getty/Carl Recine

Liverpool hefur selt írska landsliðsmarkvörðinn Caoimhín Kelleher til enska úrvalsdeildarfélagsins Brentford. Það er þó ekki bara Liverpool sem græðir á sölunni.

Hinn 26 ára gamli Kelleher hefur verið varamarkvörður Liverpool síðustu ár og oft komið mjög sterkur inn í meiðslum Alisson Becker. Hann verður núna aðalmarkvörður í ensku úrvalsdeildinni.

Sala Kelleher kemur sér einnig afar vel fyrir írska smáklúbbinn Ringmahon Rangers. Gamla félagið hans Kelleher.

Liverpool samdi við þriðju deildarfélagið fyrir tíu árum um að tuttugu prósent af sölu hans færu til félagsins.

Brentford borgar Liverpool átján milljónir punda fyrir Kelleher en írska félagið fær þrjár milljónir punda af því eða meira en hálfan milljarð króna.

„Þetta mun skipta okkur miklu máli. Hversu mikið veit ég ekki en þetta mun hjálpa okkur langt fram í framtíðina,“ sagði Paul Higgins, stjórnarmaður Ringmahon Rangers, við Irish Times.

„Ég er rosalega ánægður. Ánægður fyrir hönd Caoimhín fyrst og fremst og fyrir hönd fjölskyldu hans. Þetta er stór dagur fyrir klúbbinn og við erum mjög stolt,“ sagði Higgins.

Enski boltinn

Mest lesið


Fleiri fréttir

Sjá meira


×

Mest lesið