Brady byggir nýjan leik­vang fyrir Willum og Al­fons

Willum Þór Willumsson og Alfons Sampsted spila með félaginu sem er með mjög metnaðarfulla eigendur.

Tom Brady, sigursælasti leikmaður NFL frá upphafi, er í eigandahóp enska liðsins en Tom Wagner fer fyrir eigandahópnum.

Liðið hefur spilað á hinum 29 þúsund manna St. Andrew’s leikvangi frá árinu 1906 en ekki mikið lengur.

Brady og hinir í eigendahópnum ætla nefnilega að byggja nýjan völl fyrir Willum, Alfons og félaga þeirra.

Þeir eru búnir að kaupa landsvæði í borginni undir nýjan leikvang og ætla að eyða þremur milljörðum punda í verkefnið eða meira en fimm hundruð milljörðum íslenskra króna.

Leikvangurinn verður 62 þúsund manna völlur og líkist helst geimskipi ef marka má þær teikningar sem hafa verið opinberaðar.

Birmingham borg ætlar líka að fjárfesta í svæðinu og mun byggja nýja lestaleið frá miðbænum og að nýja leikvanginum.

Markmiði er að leikvangurinn verði tilbúinn árið 2029 og þá ætla eigendurnir líka að vera búnir að festa Birmingham liðið í sessi í ensku úrvalsdeildinni.

Birmingham hefur ekki spilað í úrvalsdeildinni síðan 2011.