Mbuemo fer fram á fimm­falt hærri laun

Mbuemo sýndi sínar allra bestu hliðar á síðasta tímabili, þegar hann skoraði tuttugu mörk og gaf sjö stoðsendingar í ensku úrvalsdeildinni. Hann á aðeins ár eftir af samningi sínum við Brentford, sem er sagt tilbúið að selja hann fyrir um sextíu milljónir punda.

Mbuemo vill helst semja við Manchester United og er sagður fara fram á fimmfalt hærri laun en hann hefur hjá Brentford. Laun hans myndu þá hækka úr 50 þúsund pundum í 250 þúsund pund á viku, en þekkt er að leikmenn leggi háar kröfur fram fyrst um sinn og semji síðan um aðeins minna.

Manchester United er hins vegar talið tilbúið að mæta kröfum Mbuemo án mótspyrnu, vegna þess að liðið er að losa sig við tvo launahæstu leikmenn liðsins, Jadon Sancho og Marcus Rashford. Þá eru Antony og Alejandro Garnacho einnig taldir á förum, þannig að United þarf nauðsynlega að styrkja sóknarlínuna.