Herra Hnetu­smjör og Sara keyptu drauma­húsið

„Draumaeignin okkar er núna framtíðarheimilið okkar,“ skrifaði Sara við mynd af Árna fyrir utan nýja húsið.

Sjá: Herra Hnetusmjör og Sara selja lúxusíbúð innan við ári eftir kaupin

Franskir gluggar og síldarbeinamynstur

Um er að ræða 274 fermetra einbýlishús á tveimur hæðum, byggt árið 2009. Húsið stendur á rúmgóðri og skjólsælli eignarlóð, umvafið háum trjám og fallegum gróðri sem tryggja næði og notalegt umhverfi.

Húsið einkennist af einstakri sveitasetursstemningu þar sem aukin lofthæð og franskir gluggar mynda hlýlegt og glæsilegt yfirbragð. Rýmisskipanin er opin og rúmgóð, með stórum stofum, eldhúsi, fjórum svefnherbergjum, tveimur baðherbergjum, þvottahúsi og bílskúr sem hefur verið breytt í stúdíóíbúð eða vinnustofu.

Á gólfum er gegnheilt parket í klassísku síldrabeinamynstri. Í miðri stofunni er stór og glæsilegur arinn sem setur heillandi og hlýlegan svip á rýmið.

Eldhúsið er prýtt stílhreinni hvíttri innréttingu með góðu skápaplássi. Þar er notalegur borðkrókur við gluggann og hurð út í garð.

Vandað viðarstigi tengir hæðirnar og liggur upp á efri hæðina, þar sem meðal annars er hjónasvíta og rúmgott skrifstofuherbergi. Útgengt er úr skrifstofunni um tvöfalda franska hurð út á svalir, þar sem opnast fallegt útsýni, meðal annars yfir Elliðavatn.

Hjónaherbergið er sannkölluð svíta, með gegnheilu parketi á gólfi, fataherbergi og sér baðherbergi með sturtu.

Hér að neðan má sjá myndir af húsinu.