Álftnesingar krækja í lykilmann Kefla­víkur

Álftnesingar greina frá tíðindunum á samfélagsmiðlum sínum, en Sigurður kemur til liðsins frá Keflavík, þar sem hann hefur leikið undanfarin tvö tímabil.

Sigurður, sem er 22 ára gamall, hóf körfuboltaiðkun hjá Haukum, en skipti yfir til Breiðabliks á unglingsárum. Hann gekk svo í raðir Keflvíkinga árið 2023 og varð bikarmeistari með liðinu 2024.

Með Keflvíkingum skilaði hann að meðaltali um tólf stigum í leik, fimm fráköstum og þremur stoðsendingum.

Sigurður hefur leikið með öllum yngri landsliðum Íslands og vann sig nýverið inn í A-landsliðið, þar sem hann hefur leikið þrjá leiki fyrir Íslands hönd.