Íslendingalið bíður Blika komist þeir á­fram

Í gær var dregið í fyrstu umferð undankeppni Meistaradeildarinnar og í dag var dregið í aðra umferð sömu keppni.

Blikar drógust á móti albanska félaginu KF Egnatia í fyrstu umferðinni í gær en Víkingar slógu þetta albanska lið út úr Sambandsdeildinni í fyrra. Blikar ná vonandi að leika það eftir í næsta mánuði.

Komist Blikar áfram þá er núna ljóst hvaða lið bíður þeirra í annarri umferðinni.

Sigurvegarinn úr einvígi Breiðabliks og Egnatia mætir pólska liðinu Lech Poznań. Með því spilar einmitt íslenski miðjumaðurinn Gísli Gottskálk Þórðarson. 

Lech Poznań er pólskur meistari síðan í fyrra og hefur mætt íslensku liði áður. Þeir slógu út Víkinga sumarið 2022 en duttu út á móti Stjörnunni fyrir ellefu árum síðan.