Enski boltinn

Tveir frá Arsenal og Bournemouth til­nefndir með nýjustu stjörnu Chelsea

Ágúst Orri Arnarson skrifar
Liam Delap skoraði tólf mörk fyrir Ipswich í fallbaráttunni og þykir líklegur til að vera valinn besti ungi leikmaður ensku úrvalsdeildarinnar.
Liam Delap skoraði tólf mörk fyrir Ipswich í fallbaráttunni og þykir líklegur til að vera valinn besti ungi leikmaður ensku úrvalsdeildarinnar. Harry Murphy/Getty Images

Tveir leikmenn Arsenal, Myles Lewis-Skelly og Ethan Nwaneri, voru tilnefndir til verðlauna fyrir besta unga leikmann ensku úrvalsdeildarinnar á nýliðnu tímabili. Nýjasta stjarna Chelsea, Liam Delap, veitir þeim samkeppni um verðlaunin ásamt þremur öðrum leikmönnum.

Milos Kerkez, vinstri bakvörður Bournemouth sem virðist vera á leið til Liverpool, Dean Huijsen, miðvörður Bournemouth sem skipti nýlega til Real Madrid, og Morgan Rogers, miðjumaður Aston Villa, voru einnig tilnefndir til verðlaunanna.

Ethan Nwaneri og Myles Lewis-Skelly, ungir og efnilegir leikmenn Arsenal eru báðir tilnefndir. Arsenal FC via Getty Images

Liam Delap þykir líklegur til að hreppa hnossið eftir að hafa skorað tólf mörk fyrir nýliða Ipswich í fallbaráttunni. Hann var keyptur af Chelsea eftir tímabilið.

Verðlaunin fyrir besta unga leikmanninn eru veitt af leikmannasamtökunum á Englandi, þar sem leikmenn eru tilnefndir af öðrum leikmönnum.

Dean Huijsen og Milos Kerkez áttu stóran þátt í velgengni Bournemouth en verða hvorugir leikmenn liðsins á næsta tímabili. Robin Jones - AFC Bournemouth/AFC Bournemouth via Getty Images

Einnig voru tilkynntar tilnefningar til verðlauna fyrir besta leikmann ensku úrvalsdeildarinnar.

Langlíklegast þykir að Mohamed Salah vinni þau verðlaun eftir að hafa orðið bæði marka- og stoðsendingahæstur allra í deildinni, á leið Liverpool að Englandsmeistaratitlinum. Salah hefur þegar verið valinn besti leikmaðurinn af blaðamönnum.

Liðsfélagi hans hjá Liverpool, Alexis Mac Allister, var einnig tilnefndur. Ásamt Bruno Fernandes hjá Manchester United, Alexander Isak hjá Newcastle, Cole Palmer hjá Chelsea og Declan Rice hjá Arsenal.

Enski boltinn

Mest lesið


Fleiri fréttir

Sjá meira


×

Mest lesið