Bjarni Ingi­mar ráðinn rekstrar­stjóri Avia

Í fréttatilkynningu þess efnis segir að Bjarni komi til Akademias með yfir tveggja áratuga reynslu úr stjórnunarstörfum tengdum hugbúnaðargerð, stafrænum umbreytingum og rekstri tæknifyrirtækja. Hann muni leiða daglegan rekstur Avia hjá Akademias, stýra þróun og útfærslu lausna og fara fyrir sjö manna tækniteymi.

„Bjarni er öflug viðbót við teymið okkar. Avia hefur verið í mjög örum vexti og við leituðum því að leiðtoga sem bæði skilur tækni og rekstur. Bjarni hefur einstaka innsýn inní hvoru tveggja. Hann hefur sýnt það í gegnum tíðina að hann getur sameinað fólk, straumlínulagað flókin kerfi og komið hugmyndum í framkvæmd,“ er haft eftir Guðmundi Arnari Guðmundssyni, framkvæmdastjóra Akademias. 

Áður en hann hóf störf hjá Akademias hafi Bjarni leitt þróun alþjóðlegs fræðslukerfis fyrir tæknigreinar, stýrt umfangsmiklum stafrænum umbótaverkefnum og innleiðingu viðskiptakerfa og gagnavöruhúsa. Hann hafi einnig stofnað og komið að uppbyggingu ýmissa sprotafyrirtækja.

„Við stöndum á miklum vatnaskilum í þróun á hugbúnaðarlausninni Avia og fræðslulausnum Akademias. Við viljum vera fyrsta val vinnustaða sem vilja nútímavæða þjálfun starfsfólks og Bjarni mun gegna lykilhlutverki á því ferðalagi,“ er haft eftir Guðmundi Arnari.

Haft er eftir Bjarna að hann sé spenntur fyrir nýju hlutverki. 

„Það er sjaldgæft að fá að ganga til liðs við teymi sem hefur bæði metnað og skýra framtíðarsýn. Í dag eru yfir 100 vinnustaðir að nýta lausnina í sínum rekstri og þeim fjölgar mikið í hverjum mánuði. Ég hlakka til að leggja mitt af mörkum og hjálpa Akademias að vaxa og skila enn betri lausnum til viðskiptavina okkar,“ segir Bjarni.

Í tilkynningunni segir að Akademias hafi verið stofnað árið 2020 af þeim Guðmundi Arnari Guðmundssyni og Eyþóri Ívari Jónssyni. Hjá Akademias starfi 27 manns við annars vegar stjórnendaskólann og hins vegar Vinnustaðaskólann. Vinnustaðir fái aðgang að yfir 210 rafrænum námskeiðum á Íslensku og fleiri tungumálum, aðgang að fræðsluráðgjöfum sem greina fræðsluþarfir og setja upp fræðsluáætlanir, framleiðslu á klæðskerasniðnum námskeiðum fyrir vinnustaði, til dæmis nýliðafræðslu og öryggisnámskeið en jafnframt Avia fræðslu- og samskiptakerfið.