„Sjúllaður“ sítrónu og jarðaberja næturgrautur

„Það verða örugglega samin ljóð um þennan unað. Hitabylgja herjar á Danaveldi og þá garga bragðlaukarnir á eitthvað svalt og kalt í munnholið. Og inn kemur þetta snarholla gómsæti eins og riddarinn á hvíta hrossinu með þessu dúndur kombói af sykurlausri sítrónusælu og jarðaberjum.

Hugurinn reikar á Amalfiströnd Ítalíu þar sem trjágreinar svigna undan spikfeitum djúsí sítrónum með hnausþykkan börk. Sítrónur og jarðaber knúsa nefnilega hvort annað eins og tvær ástfangnar pöndur,“ skrifar Ragga á kómískan hátt við færsluna á Facebook.

Uppskriftin er einföld og hentar vel sem hollur morgunverður eða millimál.

„Sjúllaður“ sítrónu og jarðaberja næturgrautur

Hráefni:

• 50g haframjöl
• 2 msk Chia fræ
• 100 ml mjólk 
• 2 msk skyr/jógúrt 
• 2 msk sítrónusæla (Lemon Curd)
• 5-7 dropar vanillu stevia
• Nokkur niðursneidd fersk jarðaber

Aðferð:

1. Hrærið saman haframjöli, sítrónusælu, chiafræjum, mjólk, jógúrti og vanilludropum.
2. Setjið hafrablönduna í fallegt glas eða krukku.
3. Skerið jarðarber í sneiðar og raðið þeim ofan í hliðarnar á glasinu og í blönduna.
4. Bætið sítrónusælu og fleiri jarðaberjum ofan á blönduna.
5. Geymið í ísskáp yfir nótt.
6. Daginn eftir má bæta við fleiri jarðaberjum, súkkulaði eða öðru sem ykkur lystir.