Ó­vænt en breytir þó ekki spám

Verðbólga hjaðnaði úr fjórum prósentum í 3,8 á milli mánaða samkvæmt tölum Hagstofunnar sem voru birtar í morgun. Greiningaraðilar höfðu spáð óbreyttri eða örlítilli hækkun á verðbólgu og var því um nokkuð óvænt tíðindi að ræða.

Bergþóra Baldursdóttir, hagfræðingur hjá Íslandsbanka, bendir á að flugfargjöld hafi lækkað um tólf prósentustig á milli mánaða og segir það skýra þróunina að mestu leyti.

„Þetta kemur okkur og örugglega öllum greiningaraðilum á óvart en þetta eru virkilega jákvæðar tölur. Það er gott að fara með þetta inn í veturinn,“ segir Bergþóra.

Gleðitíðindin hafi þó ekki áhrif á spá þeirra um að stýrivextir verði ekki lækkaðir frekar í þeim tveimur vaxtaákvörðunum sem eftir eru á árinu.

„Við erum að gera ráð fyrir að verðbólga muni aukast örlítið á næstu mánuðum, það er að segja ársverðbólga. Hún verður ennþá í kringum þessi fjögur prósent og peningastefnunefnd hefur sagt að verðbólga þurfi að hjaðna töluvert til að þeir fari að lækka vexti á ný. Þannig okkur finnst ólíklegt að vextir verði lækkaði það sem eftir er af þessu ári,“ segir Bergþóra.

Gert ráð fyrir vaxtalækkun á næsta ári

Verðbólgan sé enn ekki nálægt 2,5 prósenta markmiði seðlabankans. Hún þyrfti að hjaðna hraðar en spár gera ráð fyrir til að vaxtalækkun teljist raunhæfur möguleiki.

„Við erum hins vegar að gera ráð fyrir að verðbólga hjaðni hægt og bítandi á næsta ári og þá gætu þau haldið áfram vaxtalækkunarferlinu. En þau voru svolítið skýr með að verðbólga þyrfti að hjaðna nær markmiði áður en þau færu að lækka vexti á ný.“