„Ís­land á að vera for­dæmi fyrir önnur lið á EM“

Leik gærdagsins lauk 87-79 fyrir Slóveníu eftir mikla baráttu íslenska liðsins sem hleypti spennu í leikinn í fjórða leikhluta eftir að þeir slóvensku höfðu stungið af í þeim þriðja. Gæðin í liði Slóvena reyndust of mikil þar sem þeir svöruðu áhlaupi íslenska liðsins með þristum hinu megin á vellinum og höfðu sigurinn.

Þeir Nikolic og Sekulic sátu fyrir svörum á blaðamannafundi í gær og höfðu ekkert nema góða hluti að segja um íslenska liðið.

„Mikið hrós á Ísland. Ég tek hatt minn ofan fyrir frammistöðunni, og þetta var líklega þeirra besta frammistaða á mótinu til þessa,“ segir þjálfarinn Aleksander Sekulic og bætir við:

„Svo finnst mér líka, að ekkert lið hafi yfirspilað þá á mótinu, ekki einu sinni við. Og ekki heldur hin þrjú liðin sem þeir hafa mætt. Þeir eru lið sem gefst aldrei upp. Þetta var mikil áskorun en ég er glaður að þetta hafðist hjá okkur.“

Aleksej Nikolic átti góðan leik í gær, skoraði 17 stig og gaf fimm stoðsendingar, og var öflugur þegar mest á reyndi í lok leiks.

„Andstæðingur okkar í dag var gríðarlega sterkur. Þeir sýndu hversu mikið hjarta þeir hafa og hætta aldrei. Vegna þess ættu þeir að vera fordæmi fyrir öll önnur lið á EuroBasket. Þrátt fyrir það vissum við að við þyrftum að vera 100 prósent allar 40 mínúturnar. Við gerðum það og með þessum sigri erum við komnir til Riga sem er mikilvægast,“ sagði Nikolic á blaðamannafundi eftir leikinn í gær.

Aðeins einn leikur er eftir hjá íslenska liðinu á mótinu. Það mætir Frakklandi, lang besta liði riðilsins, á morgun.

Vísir mun áfram fylgja liðinu eftir og hittir strákana í viðtöl síðar í dag. Leikur Íslands við Frakkland fer fram í hádeginu á morgun.