Frum­sýning á Vísi: Iceguys trylla þjóðina enn og aftur í nýju mynd­bandi

Strákahljómsveitin frumsýnir nýjasta tónlistarmyndbandið sitt á Vísi í dag. Lagið heitir því skemmtilega nafni Iceguys 4 life. Strákarnir hafa á síðustu árum unnið sér fastan sess í íslensku tónlistarsenunni og eiga orðið aðdáendur á öllum aldri.

Horfa má á myndbandið í spilaranum hér fyrir neðan:

Friðrik Dór segir í samtali við Vísi að lagið, Iceguys 4 life, sé ákveðinn lokahnykkur á Iceguys-tríólógíuna. 

„Það eru ansi stór spor sem liggja eftir Iceguys á hinum ýmsu sviðum en ekkert af þessu hefði gerst ef væri ekki fyrir þann fáránlega meðbyr og stuðning sem við höfum fengið hjá þjóðinni. Við erum óendanlega þakklátir fyrir að hafa fengið að sitja í Iceguys-rússíbananum sem á þó eftir eina bunu í fullri lengd,“ segir Friðrik Dór.

Hannes Þór Halldórsson, einn eiganda Atlavíkur, sem hefur framleitt þættina um hljómsveitina og tónlistarmyndböndin, sagði í hlaðvarpinu Hlaðfréttir í vikunni að það væri draumur að loka Iceguys-ævintýrinu með bíómynd. „Við erum með sögu sem passar við þættina, og myndi stækka heiminn og gera þetta svolítið international,“ sagði hann.

Hljómsveitin hélt eftirminnilega tónleika í Laugardalshöll í fyrra þar sem uppselt var í hvert sæti og stæði. Í desember næstkomandi ætla þeir að endurtaka leikinn og eru enn þá nokkrir miðar lausir.

Iceguys hefur meðal annars gefið út lögin Krumla, Gemmér Gemmér og Rúlletta. Mikið hefur verið lagt í myndböndin og er myndbandið við Iceguys 4 life engin undantekning. 

Myndbandinu er leikstýrt og framleitt af Atlavíkurteyminu, þeim Allani Sigurðssyni, Hannesi Þór Arasyni og Hannesi Þór Halldórssyni. Allan Sigurðsson sá um kvikmyndatöku og klippingu.

Upptökur fóru fram í Hljóðrita-stúdíó í Hafnarfirði. Í myndbandinu er að sjá áður óséð myndefni sem skotið var á bak við tjöldin í Iceguys-ævintýrinu.