Pavel í baðstofubransann

Fram kemur í fundargerð nefndarinnar frá 12. nóvember síðastliðnum, sem BB vísar til, að Pavel hafi þann 30. ágúst síðastliðinn lagt umsóknina fram. Um er að ræða lóðina Hafnarstræti 4a, svæði aftan við Hafnarstræti 6. Þar verði hægt að slaka á í baðstofu, í pottum og gufu.

Pavel bendir í erindi sínu á nálægðina við Kex Hostel í gamla skrifstofuhúsnæði Kaupfélags Dýrfirðinga. Hann segir í samtali við Vísi að hann hafi unnið á hótelinu í sumar og notið sín vel.

„Þetta er mjög fallegur bær sem ég tengdist miklum böndum,“ segir Pavel. Hann hafi horft á umrædda lóð á hverjum degi og velt fyrir sér hvað stæði til með hana. Erfitt hafi verið að fá nokkur svör frá Ísafjarðarbæ nema að senda inn erindi. Sem hann og gerði.

„Þetta er allt saman bara hugmynd í augnablikinu, ekkert meira. Bara á algjöru frumstigi.“

Hógvært fólk á Þingeyri

Kristinn Vilbergsson, athafnamaður og KR-ingur, opnaði Kex-hostelið í Hafnarstræti 7 í byrjun sumars. Pavel spilaði um árabil körfubolta með KR og þekkjast þeir Kristinn vel.

Það er að heyra á Pavel að hann óttist að fólk telji að þarna gæti verið á ferðinni margra milljarða króna uppbygging eins og er tilfellið víða um land þar sem baðlón spretta upp að því er virðist eins og gorkúlur.

„Það er hógvært fólk á Þingeyri. Við viljum bara henda upp potti og gufu, hafa það næs,“ segir Pavel. Það þurfi ekki allt að vera flott og stórt. 

Eftir farsælan feril sneri Pavel sér að þjálfun en hætti sem þjálfari Tindastóls í maí 2024. Hann hefur einnig getið sér gott orð sem sérfræðingur í sjónvarpi og var í hlutverki sem slíkur í umfjöllun um Bónusdeild karla í körfubolta síðasta vetur.