Fantasýn: Hefði átt að hlusta á fá­rán­legu rökin sín

Umræðuna má heyra eftir 20 mínútur af þættinum hér að neðan.

Welbeck, sem fagnar einmitt 35 ára afmæli í dag, er fyrrverandi framherji Manchester United og Arsenal en hefur spilað með Brighton frá árinu 2020. Meiðsli hafa haft sín áhrif á hans feril en Welbeck er nú í 4. sæti yfir stigahæstu framherja ensku úrvalsdeildarinnar í fantasy-leiknum vinsæla.

Hann skoraði og hlaut átta stig fyrir leikinn við Brentford um helgina, þar sem Brighton vann 2-1 endurkomusigur. Bar Verbruggen var hetja Brighton því hann varði seinna víti Igor Thiago í leiknum, í uppbótartíma.

„Mér finnst eiginlega saga leiksins vera sú að Brentford hafi fengið sitt fimmta og sjötta víti á árinu. Hvað er að frétta með það? Næsta lið er með þrjú,“ sagði Albert Guðmundsson, annar stjórnenda Fantasýn, sem var einmitt með Verbruggen í sínu liði og græddi á varða vítinu.

Hætti við Welbeck og sér eftir því

„Welbeck er stærsta sagan fyrir mig,“ sagði Sindri Kamban sem hefði líklega betur hlustað á hjartað en heilann þegar hann valdi liðið sitt í ágúst:

„Ég hugsaði um það fyrir mót að taka hann inn, út af tveimur fáránlegum ástæðum. Annars vegar hef ég farið í ferð til Brighton, fyrir mörgum árum, og hugsaði með mér að Brighton væri skemmtilegt lið. Síðan tók ég „run“ í FIFA einhvern tímann þar sem Welbeck raðaði inn mörkum fyrir mig. En svo hugsaði ég náttúrulega með mér að ég myndi ekki velja mann í liðið bara út frá þessum tveimur ástæðum. Ég sé eftir því í dag,“ sagði Sindri.

Hlusta má á nýjasta þátt Fantasýn hér að ofan en hægt er að nálgast alla þættina með því að smella hér.