Veislan hafin og Littler feginn eftir fyrsta leik

Littler mætti Litháanum Darius Labanauskas í fyrsta leik og þó að Labanauskas megi vera stoltur af sinni frammistöðu þá átti hann ekki séns í Littler sem tapaði ekki setti í kvöld.

Frammistaða Littler var nánast fullkomin og hann getur nú tekið því rólega þar til hann stígur aftur á stokk í 64 manna úrslitum sem fram fara 20.-23. desember. Hann skoraði að meðaltali 101,54 stig, náði sjö sinnum í 180 og var frábær í útskotunum, með 64,3% hittni í ytri hringinn.

„Þetta var alls ekki auðvelt. Tölfræðin sýnir það kannski ekki en ég er ánægður með sigurinn,“ sagði Littler við Sky Sports eftir sigurinn.

„Taugarnar segja alltaf til sín en þegar maður er mættur á sviðið, búinn að vinna einn legg og eitt sett, þá kemst maður í gírinn. Það eina sem skiptir máli er að vinna settin,“ sagði Littler og bætti við:

„Ég held að allir á þessu móti vilji bara ná að vinna í fyrstu umferðinni, hún er klárlega erfiðust. Ég er mættur í þriðja sinn, fyrsti leikur búinn og nú fæ ég tíu daga hvíld.“