Því­líkur draumur fyrir tví­tugan strák á HM í pílukasti

Manby er tvítugur múrari frá Huddersfield en með þessum sigri tryggði hann sér sextíu þúsund pund eða rúmar tíu milljónir króna.

Manby komst áfram í hádegisleikjunum í dag ásamt þeim Justin Hood (vann Ryan Meikle 4-1) og Kevin Doets (vann Nathan Aspinall 4-3).

Sigur Doets kom vissulega líka á óvart enda Aspinall fimmtándi á styrkleikalista mótsins og þekkt nafn í píluheiminum. Frábær frammistaða Doets sá til þess að Aspinall verður ekki meira með á mótinu.

Doets mætir Luke Humphries í næstu umferð.

Maður dagsins var hins vegar ungi strákurinn Charlie Manby.

Ekki alveg búinn að átta mig á þessu

Manby var í samtali við Sky Sports eftir leik og var þá spurður um hversu lengi hann hefði beðið eftir þessari stundu: „Mjög lengi. Ég er ekki alveg búinn að átta mig á þessu enn þá, en þetta er allt að koma núna. Þetta er frábær tilfinning,“ sagði Manby.

Hann var spurður út í Ricky Evans og breytta framkomu hans: „Hann er skemmtilegur karakter, mér líkar vel við hann. Maður sá það breytast nánast strax þegar ég komst yfir. Skorið mitt var til staðar allan leikinn svo ég vissi að ef ég myndi hitta tvöfalda myndi ég vinna,“ sagði Manby.

Hef sýnt að ég hef kjarkinn

Um hvort hann sé að læra: „Ég er að læra mikið. Fyrsti leikurinn var virkilega erfiður svo ég hef sýnt að ég hef kjarkinn til að gera það og sá seinni var léttur, svo það sýnir að ég bý yfir báðum hliðum í mínum leik,“ sagði Manby.

Hann mun mæta Gian van Veen í sextán manna úrslitunum og þar eru hundrað þúsund pund í boði eða sautján milljónir króna.

„Mér líkar vel við Gian, mér líkar hvernig hann spilar, fljótur og ungur leikmaður. Honum gengur vel en mér líka. Ég er bara að bíða eftir að ná mínum besta leik. Ég verð hér allan tímann ef ég næ mínum besta leik,“ sagði Manby.