„Ég hélt ég myndi deyja“

Hinn 64 ára gamli Rush var fluttur á Countess of Chester-sjúkrahúsið þann 11. desember síðastliðinn og var í 48 klukkustundir á gjörgæslu eftir að hafa smitast af „ofurflensu“.

„Ég óttaðist það versta“

„Ég óttaðist það versta og hélt að þetta væri búið. Ég gat ekki andað. Ég hélt ég myndi deyja,“ sagði Ian Rush við BBC Sport.

„Þetta var mjög erfitt og ég er heppinn að hjúkrunarfólkið hjálpaði mér því það voru nokkur skipti þar sem ég hélt að ég yrði ekki hér mikið lengur. En ég er að styrkjast og mér líður miklu betur núna,“ sagði Rush.

Það var snemma morguns þegar Carol, sambýliskona Rush, hringdi á sjúkrabíl þar sem öndunarerfiðleikar hans versnuðu.

Ástandið batnaði eftir komu sjúkraflutningamannanna og Rush ákvað því að vera heima en innan tíu mínútna frá því að þeir fóru hrundi Rush niður og aftur var hringt á sjúkrabíl.

„Þetta var skelfileg upplifun. Ég hélt að þetta væri endirinn því ég gat ekki andað og fékk kvíðakast. Carol var frábær. Hún hjálpaði mér með öndunina sem gaf mér meiri tíma á meðan við biðum eftir sjúkrabílnum,“ sagði Rush.

Rush var útskrifaður eftir fimm daga en á meðan hann var á sjúkrahúsinu viðurkenndi hann að hann hefði byrjað að undirbúa hluti ef hann skyldi deyja. Síðan þá hefur hann byrjað að gera öndunaræfingar þrisvar á dag.

Gaf mér stórt spark í rassinn

„Þetta gaf mér stórt spark í rassinn. Árið 2026 verða nokkrar breytingar því það eru nokkur atriði sem ég þarf að ganga úr skugga um að ef eitthvað kemur fyrir mig þá sé allt tilbúið fyrir alla aðra,“ sagði Rush.

BBC talaði við Rush á World Sports Summit í Dúbaí.

„Læknarnir sögðu mér að sólin myndi gera mér heimsins gott og ég má fljúga svo ég er hér. Liverpool-fótboltafélagið hefur verið mjög gott. Þeir hafa sagt mér að taka eins mikið frí og ég þarf. Þá veistu að þetta er stórt fjölskyldufélag,“ sagði Rish

Á sunnudaginn eyddi hann kvöldi með mönnum eins og brasilísku goðsögninni Ronaldo og fyrrverandi framherjum Juventus og Ítalíu, Alessandro del Piero og Roberto Baggio.

Gott að hitta Baggio aftur

„Það eru litlu hlutirnir eins og að hitta Baggio, sem bjó í sama húsi og ég þegar ég var hjá Juventus, og það skiptir miklu máli,“ sagði Rush.

„Og það gefur mér orku til að halda áfram. Sumar af þessum goðsögnum hafa unnið heimsmeistaratitla og ég veit að ég hef það ekki, en það sem ég get gert er að líta til baka og segja að ég hafi verið góður og að ég sé markahæsti leikmaður Liverpool. Það gerir mig stoltan.“

Ian Rush hefur skorað 346 mörk fyrir Liverpool og er hann langt á undan Roger Hunt (285) og Mohamed Salah (250) sem koma honum næstir í fjölda marka fyrir félagið.