Af­sökunum fyrir að drekka ekki kaffi fer fækkandi

Í kaffispjalli um helgar er rætt við fólk í ólíkum störfum. Við spyrjum alltaf um hvenær fólk vaknar á morgnana, hvað það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna oftast um klukkan sjö og yfirleitt rétt á undan vekjaraklukkunni. Stundum vakna ég aðeins fyrr ef mig langar að kíkja í ræktina fyrir vinnu og stundum aðeins seinna ef ég finn að ég þarf nokkrar auka mínútur til að takast á við daginn.”

Hvað er það fyrsta sem þú gerir á morgnana?

„Alveg óvart hef ég gert það að vana að byrja morgnana á að fara í sturtu. Það er auðvitað hressandi að byrja kalda vetrarmorgna á góðri sturtu, en svo núllstillist líka hárið sem hefur orðið óstýrilátara með hækkandi aldri. Ég sveiflast milli þess að fasta á morgnana og fá mér staðgóðan morgunverð, enda á bæði að vera ógurlega hollt. En mér finnst mjög gott að borða og sannleikurinn er sá að á kvöldin þegar ég fer að sofa er ég strax farin að hugsa um hvað ég eigi að fá mér í morgunmat.

Ég hef ekki enn lært að drekka kaffi þrátt fyrir ítrekaðar tilraunir sambýlismannsins. En nú er komin fínasta kaffivél og rándýr kaffikvörn á heimilið svo afsökunum mínum fyrir því að drekka ekki kaffi fer fækkandi.

Ég á þrjá syni og þeir vakna allir á ólíkum tíma þannig oftast eru það ég og yngsti sonurinn, sem er 10 ára, sem vöknum saman og eigum góða morgunstund. Við spjöllum, borðum morgunmat og finnum til nesti saman og þetta eru oft miklar gæðastundir. Tvo morgna í viku göngum við saman í skólann þegar hann þarf að mæta með hljóðfærið og þá gefst oft tími til þess að ræða málefni líðandi stundar enn frekar. Í framhaldi af því hjóla ég yfirleitt í vinnuna.”

Hvað er hallærislegasta sjónvarpsefnið sem þú hefur fylgst með?

„Það eru nokkrar ólíkar leiðir til að skilgreina hvað telst hallærislegt sjónvarpsefni.

Þegar ég var unglingur horfði ég mjög mikið á Star Trek sem telst í flestum kreðsum frekar lúðalegt. Mér þótti erfitt á sínum tíma að sætta mig við það að ég gæti aldrei unnið í áhöfn á geimskipi sem þeytist um á ljóshraða. Á hlaupabrettinu eða yfir matseldinni finnst mér gott að horfa á breska panel show-þætti eins og 8 out of 10 cats does countdown og Taskmaster. Mörgum þykja þeir eflaust frekar hallærislegir, þar á meðal elsta syninum sem er 20 ára, en mér finnst þeir hin besta skemmtun.

En það sjónvarpsefni sem ég er kannski feimnust við að viðurkenna að ég horfi á, og þar með líklega það hallærislegasta, er Stranger Things. 

Þá þætti hef ég horft á margoft og get enn skemmt mér við að horfa á þá. Það er eitthvað við nostalgíuna og vinasamböndin í þeim þáttum sem draga mig að þeim aftur og aftur. 

Nú bíð ég bara eftir því að yngsti sonurinn verði nógu gamall til þess að horfa á þættina svo ég geti notið þess að fylgjast með honum upplifa þá.”

Í hvaða verkefni ertu að vinna helst þessa dagana?

„Hjá Taktikal erum við að vinna að undirbúningi fyrir UT-messuna sem verður haldin í febrúar ásamt því að leggja línurnar fyrir árið. Við erum lítið en öflugt teymi og það er margt skemmtilegt fram undan. Í litlu teymi er óhjákvæmilegt að bera marga hatta, þannig að auglýsingagerð, textasmíð fyrir vefsíðu og færslur fyrir samfélagsmiðla eru meðal þeirra verkefna sem ég er að takast á við þessa dagana.

Hjá WomenTechIceland erum við líka að undirbúa starfsárið en þar erum við að vinna að undirbúningi fyrir viðburð sem verður haldinn 8. mars nk. í tilefni af alþjóðabaráttudegi kvenna. Við erum líka að fara í gang með morgunverðarhittinga og fleiri spennandi viðburði þar sem við vinnum að því að auka fjölbreytni í tæknigeiranum m.a. með því að efla tengslanetið.”

Hvernig skipuleggur þú þig í vinnu?

„Þegar ég er komin í vinnuna byrja ég yfirleitt á að svara þeim skilaboðum sem bíða, renni svo yfir dagatalið og set upp verkefnalista dagsins. Hjá Taktikal erum við svo alltaf með stuttan stöðufund klukkan 9. 

Eftir hann finnst mér fátt betra en að setjast niður með rjúkandi heitan tebolla og leysa Wordle dagsins áður en ég dembi mér í verkefnin.

Ég hef prófað ýmsar aðferðir til þess að skipuleggja mig og sú sem virkar best fyrir mig er að setja upp lista á morgnana yfir þau verkefni sem ég ætla að ná að klára þann daginn. 

Áætlanir fyrir árið og hvern ársfjórðung eru í glærum og stærri verkefni held ég utan um í Linear eða öðru slíku verkefnaumsjónarkerfi. Beiðnir um verkefni geta komið úr ýmsum áttum enda markaðsdeildin stuðningur fyrir fjölmargar aðrar deildir.

Yfirleitt hef ég sett listann yfir verkefni dagsins á post-it miða enda eru þeir nógu smáir til að rúma einungis takmarkaðan fjölda af verkefnum. Þannig nær maður að setja sér einhvers konar mörk og koma í veg fyrir að maður ætli sér of mikið. Það er síðan góð tilfinning að strika yfir verkefnin á listanum þegar þau klárast.”

Hvenær ferðu að sofa á kvöldin?

„Ég miða við klukkan ellefu á kvöldin og tekst það svona oftast. Ég er alltaf með meiningar um að lesa bók fyrir svefninn en síminn á það til að fá aðeins of mikla athygli. Þetta er ekki í fyrsta sinn sem ég set mér það áramótaheiti að vera minna í símanum. Ég hef prófað ýmislegt til þess að draga úr símanotkun. Nú hefur yngsti sonurinn tekið það að sér að segja mér að hætta í símanum ef ég er ekki að gera neitt merkilegt og hann tekur því hlutverki mjög alvarlega. Ég er einnig með tímamörk á nokkrum öppum sem eiga það til að vera tímaþjófar og það hefur reynst vel. 

Annars er ég í bókaklúbb með fyrrum vinnufélögum sem er mjög hvetjandi og ég stefni á að lesa fleiri bækur í ár en ég gerði í fyrra. Batnandi manni er best að lifa og víst er að það er nóg af góðum bókum sem bíða þess að vera lesnar.”