Myndi ekki neita ef Carrick byði honum í sitt teymi

Frá þessu greinir Roon­ey í þættinum The Wa­yne Roon­ey Show á BBC en Carrick þykir lík­legastur þessa stundina til að verða ráðinn bráða­birgða knatt­spyrnu­stjóri Manchester United til loka yfir­standandi tíma­bils. Búist er við því að bráða­birgða­stjóri liðsins verði ráðinn í þessari viku.

„Hvort sem að það væri Michael Carrick, Darren Fletcher, John O´Shea eða ég sjálfur sem myndi stíga inn í þetta hlut­verk þá þarf félagið bara á því að halda að þarna komi inn stjóri sem þekkir félagið,“ sagði Roon­ey um stöðuna hjá Manchester United.

Darren Fletcher hefur stýrt Manchester United í síðustu tveimur leikjum liðsins eftir að Rúben Amorim hafði verið sagt upp störfum.

Roon­ey er á því að Manchester United hafi tapað sínum gildum frá fyrri tíð, gildum sem voru uppi á sigursælum tíma hjá félaginu en bæði Michael Carrick og Ole Gunnar Sol­skjær, fyrr­verandi leik­menn liðsins hafa farið í at­vinnu­við­tal hjá Rauðu djöflunum á undan­förnum dögum.

Að­spurður hvort hann væri til­búin í að starfa í þjálfara­t­eymi Carrick, sem þykir lík­legastur til að taka við stjórnar­taumunum hjá Manchester United, hafði Roon­ey þetta að segja:

„Ég er ekki að grát­biðja um starf í teyminu, bara svo það sé á hreinu. Ef ég yrði beðinn um að hjálpa til þá myndi ég að sjálfsögðu gera það. En það er for­gangs­at­riði núna að ráða inn nýjan knatt­spyrnu­stjóra.