„Hræddir erum við ekki“

Ísland vann góðan sigur á Póllandi eftir að hafa lagt Ítali í fyrsta leik. Báðir sigrar voru einkar sannfærandi og má segja að sterkur varnarleikur hafi lagt grunninn gegn þeim pólsku.

„Mér fannst við spila flottan leik. Það var kafli í fyrri hálfleik sem var aðeins stál í stál. Það var viðbúið. Svo fannst mér við finna taktinn og mér leið vel. Við vorum mjög þéttir varnarlega allan leikinn,“

„Kannski var færanýtingin ekki nægilega góð. Það var of mikið að dauðafærum sem hefði náttúrulega verið mjög dýrt í jöfnum leik. Við þurfum bara að laga það,“ segir Snorri Steinn.

Góður bragur á liðinu

Ítalía og Pólland eru býsna ólík handboltalið. Leikirnir tveir fólu því í sér mismunandi áskoranir fyrir strákana okkar en hvað tekur Snorri helst út úr leikjunum tveimur?

„Handboltalega séð er fullt sem ég tek út úr þessu. Mér finnst góð holning á þessu og góð orka í liðinu. Mér finnst við agaðir og skipulagðir og halda okkar striki sama hvað á gengur, þegar gengur vel og þegar við strögglum við að finna taktinn. Mér finnst góður heildarbragur yfir þessu en auðvitað þarftu svo að viðhalda því og taka það með í næsta leik. Hver leikur hefur náttúrulega sitt líf og við þurfum aftur á öllu okkar að halda á morgun,“ segir Snorri Steinn.

Það er nefnilega alvöru áskorun sem bíður í dag. Ungverjar hafa líka unnið áðurnefndu liðin tvö og má segja að stærsta áskorunin bíði í dag.

„Maður myndi halda það fyrirfram. Mér finnst enn Ítalirnir og Pólverjarnir flott lið. En ég á von á klárlega erfiðum leik, mögulega þeim erfiðasta í riðlinum. Það er fullt sem við þurfum að fara yfir og stilla okkur inn á. En alveg eins og fyrir hina tvo leikina held ég að sé mikilvægast að við náum okkar hlutum fram og spilum leikinn á morgun á okkar forsendum,“ segir Snorri Steinn.

Engin hræðsla

Ungverjagrýlan hefur strítt Íslandi undanfarin ár. Liðið tapaði agalega fyrir Ungverjum í sömu höll á HM fyrir þremur árum þar sem liðið kastaði frá sér góðri forystu. Ári síðar, á EM í Þýskalandi 2024, tapaðist með átta mörkum fyrir Ungverjum.

Snorri Steinn þekkir erfið töp og grýlur landsliðsins frá sínum tíma sem leikmaður þess. Verkar slíkt sem auka olía á eld landsliðsmanna fyrir leik morgundagsins?

„Sár töp sitja alltaf í þér og vonbrigðin. Ég trúi á mótlætið og það er eitthvað sem gerist í þannig stöðum. Þá byrjar eitthvað að gerjast. En ef við vinnum á morgun er ég ekki að hefna fyrir eitthvað sem gerðist fyrir einhverjum árum síðan. Þá er það bara frábær sigur og við komnir með tvö stig í milliriðil,“

Bence Imre, hornamaður ungverska liðsins, sagði að Íslendingar ættu að hræðast Ungverjaland. Íslenska liðið fer nú ekki að gera það?

„Nei, við bara berum virðingu fyrir þeim. Ég lít á þetta sem frábært lið sem hefur verið lengi saman með sama þjálfarann. Þeir eru rútíneraðir. En hræddir erum við ekki,“ segir Snorri Steinn.

Viðtalið má sjá í spilaranum.