Búið á tólf stöðum í tólf ára sam­bandi

„Þannig er bara vinnuumhverfið hjá mér. Þetta eru vanalega stuttir samningar, þannig að við höfum tekið bara 10 mánuði í senn á hverjum stað - og hún bara fylgir mér,“ segir hann og þau hlæja í spjalli við Lóu Pind Aldísardóttur en þau Ívar Kristján Ívarsson myndatökumaður heimsóttu Elvar og Ínu til Póllands í vetur fyrir fjórða þátt af þáttaröðinni Hvar er best að búa?

„Stundum brotnar maður alveg niður og líður illa. Þetta eru svona highs and lows. Og svo annan daginn er maður bara svo þakklátur fyrir þetta ævintýri. Þetta er allur skalinn,“ segir Ína sem dvelur að mestu í Njarðvík í vetur enda var sonur þeirra að hefja sína skólagöngu þar í haust.

„Maður verður svolítið háður ævintýrinu þó að það séu margir kostir og gallar. Mér finnst rosalega gott að eiga Ísland og svo ævintýrið“.

Í myndbandinu sem hér fylgir má sjá brot úr þættinum sem fór inn á streymiveituna Sýn+ um helgina og verður seinna sýndur í línulegri dagskrá á Sýn.

Í þáttaröðinni heimsækir Lóa alls konar fólk, m.a. íslenskar konur sem féllu fyrir ítölsku eyjalífi, unga frumkvöðla sem ákváðu að setjast að nálægt alþjóðaflugvöllum til að auðvelda ferðalög milli heimsálfa, kjarnafjölskyldu úr Hafnarfirði sem hafnaði íslenska lánakerfinu og eiga nú skuldlaust hús í spænskri sveit, ungri konu sem stofnaði kökufyrirtæki í Köben og konu á miðjum aldri sem fann ástina í örmum Spánverja á Djúpavogi sem leiddi þau til Andalúsíu þar sem við fylgjumst með brúðkaupi þeirra. Og loks kynnumst við hjónum á besta aldri sem höfðu kjark til að setjast að í alræmdri stórborg í Nígeríu umkringd vopnuðum öryggisvörðum.

Framleiðandi og leikstjóri þáttanna er Lóa Pind Aldísardóttir, myndatökumenn eru aðallega Ívar Kristján Ívarsson og Hákon Pálsson, klippingu annaðist Magnús Ingvar Bjarnason. Framleitt af Lóu Production fyrir Sýn.