Ólafur Björns­son ráðinn fjár­mála­stjóri Inchcape á Ís­landi

Þetta kemur fram í tilkynningu. Þar segir að Ólafur hafi starfað hjá Öskju frá árinu 2017 og hafi á þeim tíma komið að fjármálastjórnun og rekstri félagsins. Áður starfaði hann hjá KPMG, fyrst á endurskoðunarsviði og síðar á ráðgjafarsviði. Ólafur er menntaður viðskiptafræðingur með BS-gráðu í viðskiptafræði og meistarapróf (M.Acc) í reikningsskilum og endurskoðun. Hann býr yfir víðtækri reynslu á sviði fjármála- og rekstrarstjórnunar, bæði úr ráðgjöf og rekstri.

„Ráðning Ólafs markar mikilvægt skref í áframhaldandi uppbyggingu Inchcape á Íslandi og mun þekking hans á starfseminni, ásamt reynslu af fjármálastjórnun, nýtast vel við að styrkja grunninn undir frekari vöxt og samhæfingu rekstursins á íslenskum markaði“, segir Jón Trausti Ólafsson, forstjóri félagsins.

„Ég er þakklátur fyrir traustið og hlakka til að taka við þessu hlutverki. Ég þekki starfsemina og umhverfið vel og er spenntur fyrir því að fá tækifæri til að axla aukna ábyrgð og taka þátt í áframhaldandi uppbyggingu Inchcape á Íslandi, í góðu samstarfi við stjórnendur og starfsfólk,“ segir Ólafur.

Inchcape er alþjóðlegur, leiðandi og óháður dreifingar- og söluaðili bifreiða með um 180 ára sögu og starfsemi á fjölmörgum mörkuðum víðs vegar um heiminn. Félagið er skráð í kauphöllina í London. Í júlí 2025 var tilkynnt um samkomulag um kaup Inchcape á Öskju, Unu, Landfara og Dekkjahöllinni og hefur Inchcape því verið eigandi samstæðunnar frá september 2025.