Tengiltvinnbílar þre­falt eyðslufrekari en fram­leið­endur segja

Guardian fjallar um rannsókn Fraunhofer-stofnunarinnar sem er talin sú umfangsmesta sinnar tegundar til þessa. Hún byggir á gögnum sem bárust þráðlaust frá tengiltvinnbílum hinna og þessa framleiðenda á meðan þeir voru í akstri. Bílarnir sem rannsóknin nær til voru allir framleiddir á árunum 2021 til 2023 en gögnin sem þeir sendu frá sér gerðu rannsakendum kleift að slá nákvæmri eldsneytisnotkun þeirra fastri.

Tengiltvinnbílar ganga bæði á bensín- eða díselvél og rafhlöðu sem hægt er að hlaða. Þeir gefa ökumönnum því möguleikann á að skipta á milli rafknúins og bensínknúins akstur eftir aðstæðum og eru sömuleiðis þannig auglýstir sem sparsamir á eldsneyti.

Samkvæmt niðurstöðum rannsóknar Fraunhofer-stofnunarinnar þurfa tengiltvinnbílar að meðaltali sex lítra af eldsneyti á hverja hundrað kílómetra sem er um þrefalt meira en vottað er af Evrópusambandinu.

Patrick Plötz hjá Fraunhofer-stofnuninni segir í viðtali við þýska miðilinn SWR að þá grunaði að brunahreyfillinn í tengiltvinnbílum færi mun oftar í gang en áður var talið. Þýskir tengiltvinnbílar voru meðal þeirra sem höfðu hæstu meðaleldsneytisnotkunina og þeirra á meðal voru tengiltvinnbílar af gerðinni Porsche þeir eyðslusömustu.

Lægsta eldsneytisnotkunin var samkvæmt niðurstöðunum hjá ódýrari tengiltvinnbílaframleiðendum, í bílum frá Kia, Toyota, Ford og Renault, sem oft notuðu innan við einn lítra á 100 km, eða allt að 85% minna eldsneyti en Porsche.