Snýst í norðan­átt og snarpar hviður austan­til

Á vef Veðurstofunnar segir að búast megi við éljum norðan- og vestanlands.

Úrkomusvæði með samfelldri rigningu eða slyddu fer yfir austanvert landið, en styttir upp þar í kvöld. Það kólnar nokkuð skarpt í dag, það frystir fyrst á Vestfjörðum og í kvöld verður orðið frost á öllu landinu.

Fram kemur að það sem af er ári hafi veður á landinu verið óvenjulega tilbreytingarlítið og hafi austan- og norðaustanáttir verið ríkjandi. Nú hafi hins vegar orðið umskipti í veðrinu og á næstunni taki við veðurlag sem einkennist af breytileika. Bæði verði veðrið breytilegt milli landshluta og einnig breytilegt með tíma innan sama landsvæðis.

Að þessu sögðu, þá skal nú gerð tilraun til að setja fram veðurspá fyrir landið allt í dag. Eftir sunnanáttina í gær, þá snýst í norðan- og norðvestanátt í dag, víða á bilinu 8-15 m/s, en 13-20 með snörpum hviðum á Austfjörðum undir kvöld. Búast má við éljum norðan- og vestanlands. Úrkomusvæði með samfelldri rigningu eða slyddu fer yfir austanvert landið, en styttir upp þar í kvöld. Það kólnar nokkuð skarpt í dag, það frystir fyrst á Vestfjörðum og í kvöld verður orðið frost á öllu landinu.

Á morgun, miðvikudag, er útlit fyrir suðvestan- og sunnanátt. Það má búast við éljum, en þegar kemur fram á daginn er gert ráð fyrir að úrkomusvæði með snjókomu fari yfir vesturhelming landsins frá suðri til norðurs. Austanvert landið ætti að sleppa við úrkomu á morgun,“ segir í hugleiðingum veðurfræðings. 

Veðurhorfur á landinu næstu daga

Á miðvikudag: Suðvestan og sunnan 8-15 m/s og snjókoma eða él, en yfirleitt þurrt á austanverðu landinu. Frost 0 til 10 stig, mildast suðvestanlands.

Á fimmtudag: Suðaustan 5-13 og rigning eða slydda með köflum sunnanlands, en þurrt að kalla á Norður- og Austurlandi. Hiti 0 til 6 stig. Gengur í norðan 10-18 með snjókomu og frosti á vestanverðu landinu.

Á föstudag: Ákveðin vestlæg átt með éljum eða snjókomu, en styttir upp á austanverðu landinu síðdegis. Frost 3 til 12 stig

Á laugardag: Breytileg átt. Dálítil él vestantil, en snjókoma eða slydda á austurhelmingi landsins. Frost 0 til 10 stig, mildast við austurströndina.

Á sunnudag og mánudag: Suðvestlæg átt með éljum eða snjókomu, en úrkomulítið norðaustantil á landinu. Frost um allt land.