Ís­lensk hjón búa um­kringd öryggis­vörðum

Sú örlagaríka atkvæðagreiðsla leiddi þau hjónin á braut ævintýra sem ekki sér fyrir endann á. Eitt leiddi af öðru, Snorri fór að vinna hjá dansk-sænska mjólkurfyrirtækinu Arla sem er með starfsemi víða um heim. Þegar honum bauðst starf hjá Arla í Kína var Kolla umsvifalaust til en Snorri var tvístígandi.

 „Maður þarf að stökkva á þetta - lífið getur verið búið á morgun,“ segir Kolbrún. En eftir heimsókn til danska tannlæknisins sem hélt einræðu yfir Snorra um sín töpuðu tækifæri í framandi löndum - ákvað hann að láta slag standa. Þau hjónin fluttu því til Kína í nokkur ár og eftir þá dvöl bauðst þeim að flytja til Nígeríu. Þar sem þau búa núna - og þangað heimsóttu Lóa Pind Aldísardóttir og Ívar Kristján Ívarsson tökumaður þau í haust fyrir lokaþáttinn af Hvar er best að búa?

Þar starfar Snorri sem framkvæmdastjóri mjólkursviðs Arla í Nígeríu og er búinn að hanna og láta reisa fyrsta og eina stóra tæknivædda kúabú Vestur Afríku. Og líf þeirra í milljónaborginni Lagos er gjörólíkt lífi okkar sem búum á Íslandi - þau búa á manngerðri eyju í Lagos, þar sem eina leiðin inn og út er í gegnum vopnuð öryggishlið, og eru iðulega í lögreglufylgd þegar þau fara út fyrir eyjuna. Kúabúið sem Snorri hannaði er á óróasvæði í Norður-Nígeríu - og þar eru öryggisráðstafanir gríðarlegar.

Hægt er að fá innsýn í ævintýralegt líf þessara kjörkuðu íslensku hjóna í lokaþætti af sjöundu þáttaröð Hvar er best að búa? sem er kominn inn á Sýn+ og fer seinna í línulega dagskrá. Í myndbandinu sem hér fylgir má sjá nokkur brot úr þættinum.

Í þáttaröðinni heimsækir Lóa alls konar fólk, m.a. unga frumkvöðla sem ákváðu að setjast að nálægt alþjóðaflugvöllum til að auðvelda ferðalög milli heimsálfa, kjarnafjölskyldu úr Hafnarfirði sem hafnaði íslenska lánakerfinu og eiga nú skuldlaust hús í spænskri sveit og ungri konu sem stofnaði kökufyrirtæki í Köben.

Framleiðandi og leikstjóri þáttanna er Lóa Pind Aldísardóttir, aðalmyndatökumaður er Ívar Kristján Ívarsson, klippingu annaðist Magnús Ingvar Bjarnason. Framleitt af Lóu Production fyrir Sýn.