Særðir og í hefndar­hug: „Erum að fara í al­vöru skrímsli“

Endur­komu­sigur föstu­dagsins var magnaður í meira lagi sagt. Enda­lokin og sigur­karfa Elvars Más eins ævintýra­leg og það á móti einu af sterkasta lands­liði Evrópu. Slíkir sigrar geta drifið menn upp í skýja­borgir, þar er gott að dvelja en mikilvægt um leið að koma sér aftur niður á jörðina fyrir næsta verk­efni. Annan leik gegn Litáen, nú á úti­velli, í sömu keppni.

„Já auðvitað er það þannig en þeir eru vel gefnir,“ segir Baldur Þór, að­stoðarþjálfari lands­liðsins að­spurður hvort það hafi verið verk­efni að kippa mönnum aftur niður á jörðina. „En þeir vita það alveg að leik­maður sem er tólfti á listanum hjá Litáen er að spila á sama gæða­stigi og Elvar Már. Hver einasti maður í liðinu hjá þeim er að spila í bestu deildum Evrópu. Það þarf full­komnun á öllum vígstöðvum hjá okkur, okkar bestu leiki til að geta gert eitt­hvað á móti svona liðum.“

„Getum gert ótrúlega hluti í erfiðum aðstæðum“

Ís­lenska lands­liðið hefur sótt svona sigra, á móti sterkum þjóðum, áður. Slíkir sigrar gefa ýmis­legt.

„Eins og hinir stóru sigrarnir gefur þetta enn meiri trú á verk­efninu. Núna ertu með sönnun fyrir því að þú getir gert þetta. Það gefur þér ótrú­lega mikið. Þetta gefur okkur meiri trú á sjálfa okkur. Við vitum að við getum gert ótrú­lega hluti í erfiðum aðstæðum.“

Og erfiðar aðstæður taka á móti liðinu seinna í dag í Litáen. Upp­selt er á leikinn við heima­menn sem fjöl­menntu í Laugar­dals­höllina á föstu­daginn og verða í al­gjörri yfir­tölu í stúkunni í dag. Heima­menn vilja hefna fyrir ófarirnar hér á Ís­landi.

„Þetta er annar leikur liðanna á skömmum tíma. Liðin þekkja því hvort annað betur núna. Það verður minna af hlutum sem kemur hvoru liðinu á óvart. Það sem við erum að fara út í er sjö þúsund manns, upp­seld höll, heima­völlurinn þeirra. Þeir eru særðir eftir erfitt tap. Við erum að fara út í rosa­lega árásar­gjarnt Litáenskt lið. Þeir munu mætta rosa­lega harðir og árásar­gjarnir á báðum endum vallarins. Við þurfum að vera líkam­lega, and­lega og taktískt­lega séð til­búnir í þennan kraft og orku sem verður til staðar þarna. Ef við náum að standa það af okkur, spila körfu­bolta­leik við þá. Þá höfum við fulla trú á því að við getum náð í sigur aftur. En við þurfum að ná að halda okkur í takti við þá frá fyrstu mínútu.“

Starf þjálfarans undir?

Pressan er gífur­leg á litáenska lands­liðinu og ekki verður unað við annað tap á nokkrum dögum gegn Ís­landi.

„Miðað við um­ræðuna í fjölmiðlum hér í Litáen og stærðinni á þessu þá reikna ég með því að þjálfarinn sé bara að spila fyrir starfi sínu í þessum leik. Þeir eru mjög særðir. Við vitum þetta, þegar lið spila tvo leiki með skömmu milli­bili, þá hvetur tap þig áfram til þess að gera allt sem þú getur til að bæta fyrir það. Við erum að fara í al­vöru skrímsli. Það verður bara mjög krefjandi en við teljum okkur til­búna í það. Við höfum spilað á erfiðum úti­völlum áður með troðfullar hallir og nýtum þá reynslu sem við höfum úr þannig aðstæðum og komum inn í þetta með æðru­leysi og ein­hvers konar mark­mið um að gera þetta að óþægi­legu partýi fyrir heima­menn.“

Þrjár umferðir eru eftir af þessum hluta undankeppninnar og er Ísland á toppi D-riðils fyrir leiki dagsins. Þrjú efstu lið hvers riðils fyrir sig tryggja sér sæti í annarri umferð undankeppni HM. 

Leikur Litáen og Ís­lands í undan­keppni HM í körfu­bolta hefst klukkan hálf fimm í dag. Leiknum verður lýst í beinni textalýsingu á Vísi.