Tryggvi góður en Bilbao fór tóm­hent heim

Bilbao tapaði þá með nítján stigum á útivelli á móti sterku liði Murcia, 100-81, en Murcia er í þriðja sæti deildarinnar á meðan Bilbao er í níunda sæti.

Tryggvi Snær var með 16 stig og 8 fráköst á þeirri 21 mínútu sem hann spilaði en hann hitti úr sex af sjö skotum sínum utan af velli og var líka með eina stoðsendingu og eitt varið skot.

Bilbao var 25-22 yfir eftir fyrsta leikhluta en tveimur stigum undir í hálfleik, 47-49. Seinni hálfleikurinn var síðan mjög erfiður en Tryggvi var kominn með tólf stig í hálfleik.

Bilbao er að berjast um sæti í úrslitakeppninni og hafði unnið tvo leiki í röð og þrjá af síðustu fjórum en þetta tap þýðir að liðið situr fyrir utan úrslitakeppnina eins og staðan er núna.