Littler út­skýrir af hverju hann kallaði Van Veen grenjuskjóðu

Littler og Van Veen mættust á níunda keppniskvöldi úrvalsdeildarinnar í byrjun þessa mánaðar.

Littler fagnaði þegar Van Veen mistókst að tryggja sér sigurinn í viðureigninni sem Hollendingurinn tók óstinnt upp. Littler tókst sjálfum ekki að klára leikinn en sýndi síðan „væluskjóðu“ látbragð út í salinn. 

Á endanum tryggði Van Veen sér sigurinn og eftir leikinn sagði hann Littler hafa sýnt sér dónaskap.

Hinn nítján ára Littler hefur nú tjáð sig um uppákomuna í leiknum á keppniskvöldinu í Manchester.

„Það sem fólk sá ekki var að þegar ég labbaði til baka horfði ég áfram í áttina að áhorfendum og sá að hann hafði sett pílurnar sínar niður. Aðrir sáu það ekki,“ sagði Littler.

„Hann er sá sem gerði ekki sitt, að sýna virðingu. Ég held að þetta sé í fyrsta sinn sem ég sé einhvern leggja pílurnar sínar niður fyrir framan mig. Ég hugsaði bara: Af hverju? Ég kallaði hann grenjuskjóðu því það var engin ástæða fyrir hann að setja pílurnar niður. Þegar hann vann tók ég pílurnar mínar og óskaði honum til hamingju.“

Littler vann sigur á áttunda keppniskvöldi úrvalsdeildarinnar en hefur ekki komist áfram úr átta manna úrslitunum á síðustu tveimur keppniskvöldi.

Næsta keppniskvöld fer fram í Rotterdam á fimmtudaginn og þar gætu Littler og Van Veen mæst í undanúrslitum.

Littler er í 2. sæti úrvalsdeildarinnar með 21 stig, þremur stigum á eftir Jonny Clayton. Van Veen er fimmti með tólf stig.