Að­eins einn miðvörður til taks hjá United fyrir stórleikinn

Leny Yoro mun missa af leiknum vegna meiðsla samkvæmt The Athletic og óttast er að hann gæti verið frá til lengri tíma. Frakkinn ferðaðist ekki með United-liðinu til Lundúna í gær.

Bæði Harry Maguire og Lisandro Martinez verða í leikbanni þegar Manchester United mætir Chelsea í kvöld. Maguire fékk einn auka leik í bann fyrir agabrot í leik gegn Bournemouth en Lisandro Martinez fékk rautt spjald í síðasta leik gegn Leeds fyrir hártog.

Matthijs de Ligt hefur svo verið á meiðslalistanum alveg síðan í nóvember og verður ekki með gegn Chelsea.

Í fjarveru þeirra fjögurra er aðeins einn miðvörður eftir hjá Manchester United, hinn nítján ára gamli Ayden Heaven.

Búist var við því að Yoro og Heaven yrðu í byrjunarliðinu en nú mun væntanlega annar hvor bakvörðurinn, Noussair Mazraoui eða Luke Shaw, leysa miðvarðarstöðuna.

Miðjumaðurinn Manuel Ugarte kemur líka til greina en hann gæti þurft að vera á miðjunni ef Kobbie Mainoo er ekki klár í slaginn.

Leikurinn er gríðarlega mikilvægur fyrir Manchester United og sigur myndi gefa liðinu tíu stiga forskot á Chelsea í baráttunni um Meistaradeildarsæti.

Chelsea og Manchester United mætast í beinni útsendingu á Sýn Sport klukkan 19:00 í kvöld.