„Til há­borinnar fyrir­myndar og ég er á­nægður með það“

„Við gerðum mistök í báðum þessum mörkum en ég ætla nú ekki að fara að taka það af Blikunum að þær gera það sem þær gera mjög vel,“ sagði Jóhann Kristinn Gunnarsson, þjálfari Þróttar, eftir fyrsta leik tímabilsins.

„Þú þarft að vera rosalega vakandi þegar þær koma boltanum svona oft inn fyrir þig og það getur alltaf eitthvað hættulegt gerst á þeim augnablikum. Við vorum bara klaufar í fjórum atvikum og þær hafa sennilega átt að enda með fjögur mörk.“

Jóhann var ánægður með margt en hefði viljað sjá liðið hrista mörkin af sér fyrr og gera betur sóknarlega.

„Ég hef engar afsakanir í sjálfu sér fyrir okkur, við hefðum átt að gera betur. Við getum spilað betur heldur en þetta. Það jákvæða er að leikmenn missa aldrei trúna á það að þeir geti komið til baka, hvort sem að það er 40 mínútur á klukkunni, 75 eða 92.“

„Við erum bara búin að taka úr okkur hrollinn núna, við skulum bara segja það. En við töpuðum hér á mjög sterkum heimavelli Breiðabliks.“

Það var mætt vel í stúkuna á Kópavogsvelli hjá báðum liðum og það var svona alvöru fótboltasumar stemning.

„Það er andi í liðinu okkar og ég verð eiginlega kannski að segja ofan á það, svona það jákvæðasta, það er mætingin hjá okkar fólki og stuðningurinn frá stuðningsfólki okkar í Þrótti. Hann var til háborinnar fyrirmyndar og ég er gríðarlega ánægður með það. Ég veit alveg hvað stelpurnar tala um inni í klefa núna, að þær ætla að þakka fyrir þetta í næsta leik.“