Sláandi hve mikið skattarnir hafi hækkað

Samantekt samtakanna leiðir í ljós að skattarnir námu 0,8 prósentum af landsframleiðslu sem er tvöfalt hærra en er að jafnaði í ríkjum OECD. Hlutfallið er mun hærra en á hinum Norðurlöndunum. Fjórfalt hærra en í Noregi og tvöfalt hærri en í Finnlandi.

Sigurður segir þróunina sláandi og hvatann hjá sveitarfélögunum sérstaka.

„Við þekkjum það hvernig lóðaskortur undanfarinna ára, yfir langt tímabil, hefur leitt til hærra fasteignaverðs sem hækkar fasteignamatið og þar af leiðandi verða fasteignaskattarnir hærri,“ segir Sigurður.

„Síðan er líka áhugavert að sjá ekki meiri samkeppni milli sveitarfélaga um að laða til sín atvinnustarfsemi. Blómlegt atvinnulíf er forsenda sterkra sveitarfélaga og öflugs mannlífs.“

Skattarnir séu gallað tekjuöflunartæki og þar sé ábyrgðin hjá ríkinu. Þarf þurfi að fara fram endurskoðun. Sveitarfélög berjast mörg hver í bökkum og segir Sigurður að skoða þurfi tekjumódel sveitarfélaganna vel.

„Og það er mjög stórt viðfangsefni. Hins vegar verður líka að benda á að sum sveitarfélög sinna verkefnum sem eru ekki lögbundin.“

„Ég held að þar hljóti að liggja einhver tækifæri til að hagræða í rekstri með því að einbeita sér enn frekar að þeim verkefnum sem sveitarfélögunum eru falin með lögum,“ segir Sigurður Hannesson framkvæmdastjóri Samtaka iðnaðarins.