Stuðnings­maður Grinda­víkur í bann fyrir bjórdósakast

Grindavík og Tindastóll eigast við úrslitaeinvígi um Íslandsmeistaratitilinn í körfubolta þessi dægrin. Grindavík leiðir einvígið 2-0 eftir sigur á Sauðárkróki í fyrrakvöld.

Í fyrsta leik liðanna í Grindavík höfðu heimamenn einnig betur en atvik í stúkunni skilur eftir svartan blett.

Stuðningsmaður Grindavíkur kastaði þá bjórdós í átt að stuðningsfólki Tindastóls og hefur viðkomandi verið úrskurðaður í bann frá næsta leik vegna atviksins.

Körfuknattleiksdeild Grindavíkur biður stuðningsfólk Tindastóls afsökunar á atvikinu í yfirlýsingu. Liðin eigast við þriðja sinni annað kvöld í Grindavík þar sem Grindvíkingar geta orðið Íslandsmeistarar.

Mikil spenna er fyrir leiknum og uppselt varð á þremur mínútum eftir að miðar fóru í sölu í gær.

Vera má að Grindavík verði án DeAndre Kane, en kæra á hendur honum liggur á borði aganefndar KKÍ, vegna hegðunar hans eftir leik á Króknum í vikunni.

Yfirlýsing frá Körfuknattleiksdeild Grindavíkur

Á fyrsta leik Grindavíkur og Tindastóls kom upp alvarlegt atvik þar sem áhorfandi kastaði dós í átt að stuðningsfólki Tindastóls.

Körfuknattleiksdeild Grindavíkur fordæmir slíka hegðun alfarið. Hún á ekkert erindi í íþróttahús, getur skapað hættu fyrir aðra gesti og er í algjörri andstöðu við þau gildi sem við viljum standa fyrir.

Við biðjum stuðningsfólk Tindastóls einlæglega afsökunar á þessu atviki. Gestir okkar eiga alltaf að geta mætt í HS Orku höllina, stutt sitt lið og notið leiksins í öruggu og virðingarfullu umhverfi.

Við höfum brugðist við málinu og viðkomandi áhorfandi hefur verið settur í bann á næsta heimaleik Grindavíkur.

Við viljum að HS Orku höllin sé kraftmikill, hávær og skemmtilegur heimavöllur — en alltaf á grundvelli virðingar, öryggis og góðrar framkomu. Við biðjum alla stuðningsmenn að standa með okkur í því.

Áfram Grindavík