Sjáðu öll til­þrif Pargo: „Aldrei séð annað eins á fjölum á Ís­landi“

Frammistöðu Pargo í lýsingu Gumma Ben og Harðar Unnsteinssonar á Sýn Sport Íslandi má sjá hér að neðan.

Pargo skoraði alls 48 stig í leiknum sem er nánast einsdæmi í úrslitaeinvígi á Íslandi. Hann fór fyrir sínu liði frá upphafi og skoraði 22 stig í fyrsta leikhlutanum, þegar Grindvíkingar, sem léku án þriggja lykilmanna, bjuggu til bil sem Tindastóli tókst aldrei að brúa.

Pargo setti meðal annars niður tíu þrista í leiknum, sem er met í úrslitum í óframlengdum leik, og þar af var náðarhöggið sem hann veitti Tindastólsmönnum þegar hann jók muninn í 105-101 hálfri mínútu fyrir leikslok.

Sérfræðingarnir í Körfuboltakvöldi áttu vart orð til að lýsa frammistöðu Grindavíkur en bentu þó á að fleiri hefðu átt skínandi frammistöðu fyrir Grindavíkurliðið. Enginn lék þó eins og Pargo og enginn í deildinni gæti leikið eins og Pargo gerði í gær, að mati sérfræðinganna:

„Ég hef aldrei séð annað eins á fjölum á Íslandi,“ sagði Hermann Hauksson í beinni útsendingu úr Síkinu í gærkvöld.

„Það sem Pargo sýndi okkur hérna í dag er bara eins og Hlynur [Bæringsson] sagði… gæðin sem hann er með, þetta Euroleague-, NBA-dæmi… Hérna sýndi hann bara nákvæmlega hvaða gæði hann hefur fram yfir alla aðra leikmenn í þessari deild,“ sagði Hermann en hinn fertugi Pargo á að baki feril í sterkustu deildarkeppnum heims, NBA-deildinni og Euroleague.

„Þetta er ótrúlegt. Þessi leikur hjá honum var bara sturlun. Ég er orðlaus,“ sagði Magnús Þór Gunnarsson sem þó þekkir það vel að raða niður þriggja stiga skotum sjálfur.