„Er týpan sem er til í að taka nýjar á­skoranir“

Það er aðeins eitt ár síðan Baldur gerði Stjörnuna að Íslandsmeisturum og en af hverju ákvað hann að fara til Álftaness?

„Þeir eru með gott starf og reyna að búa til alvöru efstudeildar lið. Mér líst vel á þetta verkefni. Auðvitað er planið að gera vel á leikmannamarkaði og vera með lið í toppbaráttu. Það er vilji hjá mér að koma liðinu í toppinn og gera allt sem ég get í því. Ég veit að það er það sem samfélagið vill líka. Þeir hafa fengið smjörþefinn af þessu og vita hvað þetta er skemmtilegt,“ segir Baldur Þór og verður áhugavert að sjá hvaða leikmenn hann fær til félagsins.

Stuðningsmenn Stjörnunnar voru margir hverjir hissa að Baldur skildi yfirgefa félagið og Hlynur Bæringsson Stjörnumaður sagði í Körfuboltakvöldi í fyrradag að þeir væru pirraðir.

„Kannski ef maður lítur yfir minn feril þá er ég kannski þessi týpa sem er til í að taka nýjar áskoranir. Það er eitthvað sem er í mér þegar flæðið liggur í þá átt. Þá er ég til í að prófa nýja hluti og þetta er fín tímasetning til að taka við Álftanesi.“

Baldur segist vera stoltur af sínu starfi hjá Stjörnunni og neitar því ekki að það verði sérstakt að mæta með lið Álftaness í Ásgarð næsta vetur.

„Það verður sérstakt. Það var líka sérstakt fyrir mig í langan tíma að fara til Þorlákshafnar eftir að hafa alist þar upp. Líka sérstakt að fara aftur á Krókinn eftir minn tíma þar. Það er eins og það er og þetta mun gefa leikjunum aukakrydd sem bæði lið ættu að geta nýtt sér til þess að auglýsa leikina. Það er bara stemning og það sem fylgir þessu.“