Hitinn sló þann besta úr leik

Sinner hafði unnið fyrstu tvö settin, 3-6 og 2-6, og var 1-5 yfir í þriðja settinu þegar hann örmagnaðist.

Dómari leiksins tók eftir því að ekki var allt með felldu og leyfði læknum að kíkja á Sinner.

„Ég þarf að æla,“ sagði Sinner þegar hann gekk af velli, algjörlega bugaður.

Cerúndolo náði að snúa þriðja settinu við og vinna 7-5. Hann vann síðan næstu sett örugglega, 6-1 og 6-1.

Um er að ræða risatíðindi í tennisheiminum því Sinner er efstur á heimslistanum, þótti lang sigurstranglegastur og hefði klárað alslemmuna með sigri á Opna franska meistaramótinu.

Sinner féll hins vegar ekki úr leik því hann spilaði illa heldur sló hitinn hann út.

Sinner hefur áður átt í vandræðum með að spila í háum hita og dró sig úr keppni, eftir að hafa fengið „krampa í allan líkamann“ á ATP Masters 1000 móti í Sjanghæ á síðasta ári.

Ljóst er þá að nýr risamótsmeistari verður krýndur um næstu helgi en Sinner og Carlos Alcaraz hafa unnið öll risamótin síðustu tvö ár rúmlega.