Allt að 200 ára veggja­krot fannst við fram­kvæmdir

Gamli skóli Menntaskólans í Reykjavík er eitt helsta kennileiti miðborgarinnar. Hann var fyrsta þartilgerða skólahús landsins, reist á árunum 1843 til 1846, hefur auk menntaskólans hýst Alþingi Íslendinga og aðalstöðvar breska landnámshersins.

Síðustu þrjú ár hefur verið unnið endurbætum á völdum skólastofum með það að marki að bæta loftgæði og hljóðvist en einnig að koma stofunum í eins upprunalegt horf og auðið er.

Allt að 180 ára gamalt 

Ein þessara stofa er hin svokallaða castría sem hýsti lengi vel nemendur á öðru námsári. Klæðningin var rifin niður með það í huga að taka kennslustofuna aftur í notkun sem slíka eftir að hafa lengi verið notuð undir fatahengi og síðar skrifstofur. Við það komu krítaráletranirnar í ljós.

„Þessi áletrun er annað hvort frá því að húsið er reist upphaflega. 1846 er skólinn settur í fyrsta skipti þann 1. október. Hann á 180 ára afmæli núna í ár. Þetta gæti verið alveg síðan þá. Mjög líklega væri þetta þá kannski á dönsku eða norsku. Það er Dani sem teiknar þetta hús og svo er þetta norskir smiðir sem byggja húsið,“ segir Sólveig Guðrún Hannesdóttir rektor Menntaskólans í Reykjavík.

Hinn möguleikinn er sá að áletrunin sé frá síðari hluta sjötta áratugarins þegar síðast var ráðist í framkvæmdir í stofunni.

Verkstjóri, stígur og Kristinn Ármannsson meðal getgáta

Áletrunin er gerð með skrautlegum skrifstöfum sem torveldar lesturinn. Sérstaklega þegar hugsanlegt er að hún hafi verið gerð fyrir 180 árum síðan.

„Þetta gæti verið einhver danska. Mottager eða stiger,“ segir Sólveig en það síðarnefnda telur hún hugsanlega geta vísað til svokallaðs stiger sem er danskt orð yfir verkstjóra einhvers konar. Við yfirborðskennda rannsókn virðist það þó aðallega vísa til verkstjóra í námugreftri. 

„Sumir hafa haldið að þetta sé stígur eða Amtmannsstígur sem er auðvitað gatan hér. Aðrir hafa spáð í því hvort þetta sé K og hvort þetta sé þá nafnið á rektor þess tíma, Kristinn Ármansson.“

Starfsmenn skólans hafa ýmsar kenningar og hafa einnig leitað aðstoðar almennings á samfélagsmiðlum við að leysa ráðgátuna. Lesendur eru hvattir til rýna í myndirnar og spreyta sig á að ráða letrið.