Val­geir Örn af skjánum til Landsnets

Í tilkynningu frá Landsneti segir að hann muni leiða samskipti fyrirtækisins við almenning, hagaðila og fjölmiðla, auk þess að bera ábyrgð á innri upplýsingagjöf til starfsfólks.

Síðustu ár hefur Valgeir gegnt stöðu varafréttastjóra ásamt því að vera sjónvarpsfréttaþulur og stýra umræðuþættinum Silfrinu. Þá hefur hann lagt áherslu á að byggja upp stafræna fréttamiðla Rúv. Valgeir er með MBA-gráðu frá Háskólanum í Reykjavík og BA-gráðu í stjórnmálafræði frá Háskóla Íslands.

„Landsnet leggur mikla áherslu á opin og góð samskipti. Við viljum eiga aðgengilegt og upplýsandi samtal við landsmenn um okkar mikilvægu starfsemi og um þau verðmæti og lífsgæði sem öflugt flutningskerfi raforku á þátt í að skapa. Ráðning Valgeirs er hluti af breytingum hjá Landsneti til að vera enn betur í stakk búin að sinna okkar hlutverki. Við bjóðum hann velkominn til starfa,“ er haft eftir Ríkharði Ríkharðssyni, aðstoðarforstjóra Landsnets, í tilkynningunni.

Steinunn Þorsteinsdóttir, sem áður gegndi stöðu upplýsingafulltrúa Landsnets frá árinu 2016, lét af störfum í maí þegar hún réð sig til Sameykis.